ԵՐԵՎԱՆ, 14 դեկտեմբերի – Sputnik. ՀՀ գլխավոր դատախազությունը սահմանադրի կամքի փոփոխման վտանգ է տեսնում։ Այսօր լրագրողների հետ զրույցում ասաց ՀՀ գլխավոր դատախազի տեղակալ Գևորգ Բաղդասարյանը` մեկնաբանելով ընդդիմադիր պատգամավորների կալանավորման դադարեցման մասին գլխավոր դատախազության հայտարարությունը։
Նշենք` ՍԴ այն որոշումից հետո, որ անազատության մեջ գտնվող պատգամավորի կարգավիճակ չունեցող անձը պատգամավոր դառնալու պահից չի կարող պահվել անազատության մեջ, «Հայաստան» խմբակցության պատգամավորներ Արմեն Չարչյանը, Արթուր Սարգսյանը (Սիսիանի նախկին ղեկավար) և Մխիթար Զաքարյանը (Մեղրիի նախկին ղեկավար) ազատ էին արձակվել:
Բաղդասարյանը նշեց, որ իրենք կտրականապես համաձայն չեն այն պնդմանը, որ պատգամավորների հետապնդման մեջ քաղաքական ենթատեքստ կա։
«Երբ որևէ մեկը տրամադրված է տեսնել այն, ինչ ուզում է, տեսնում է։ Կան դեպքեր, երբ մարդուն ձերբակալում են թմրանյութեր պահելու համար, վերջինս էլ պնդում է, թե իր նկատմամբ քաղաքական հետապնդում է իրականացվում, որովհետև ինչ-որ քաղաքական ուժի է հարում։ Այսինքն` երբ դատարանի որոշումը դուր է գալիս, դատարանը լավն է, երբ դուր չի գալիս, քաղաքական հետապնդո՞ւմ է»,– նշեց գլխավոր դատախազի տեղակալը։
Նա ընդգծեց, որ ՍԴ–ն ինչ–որ չափով կիսում է դատախազության դիրքորոշումը, և պարզաբանեց` Սահմանադրությունն էլ է նույն իմաստով մեկնաբանում քրեական հետապնդման հարուցման և ազատությունից զրկելու հետ կապված իրավիճակը։ Բաղդասարյանի խոսքով` ԱԺ պատգամավոր Արմեն Գևորգյանի մասով պնդել են, որ քրեական հետապնդում շարունակելու համար ԱԺ համաձայնություն պետք չէ։ Սահմանադրության մեջ քրեական հետապնդում հարուցելն ու ազատությունից զրկելը լրիվ նույն, միատեսակ կարգավորման են ենթարկվում։
«ՍԴ որոշումն անկանխատեսելի իրավիճակներ կստեղծի, և գլխավոր դատախազությունը նրա հետ համաձայն չէ, քանի որ սահմանադրական կամքի վտանգ է տեսնում»,– նշեց Բաղդասարյանը։
Հիշեցնենք, որ դեկտեմբերի 13-ին դատախազությունը հայտարարություն էր տարածել և ընդգծել, որ ՍԴ–ն խեղաթյուրում է պատգամավորական անձեռնմխելիության հիմքում ընկած գործառութային անհրաժեշտության գաղափարը։