ԵՐԵՎԱՆ, 13 դեկտեմբերի - Sputnik. «Երևանի ավտոբուս» ՓԲԸ տնօրեն Էլբակ Թարփոշյանը աշխատանքից ազատման դիմում է ներկայացրել: Տեղեկությունը Facebook-ի իր էջում հայտնել է Երևանի քաղաքապետի մամուլի խոսնակ Հակոբ Կարապետյանը։
Նա ամփոփել է Երևանի հանրային տրանսպորտի հետ կապված այսօրվա իրադարձությունների արդյունքները` շեշտելով, որ տրանսպորտի վարորդների հետ համապատասխան ստորաբաժանումների քննարկումների արդյունքում վարորդները վերադարձել են աշխատանքի:
«Վարորդների աշխատանքային պայմանների շարունակական բարելավման խնդիրը քաղաքապետարանի օրակարգում է: Քաղաքային իշխանությունն արդեն իսկ գործուն քայլեր արել է և շարունակելու է անել այդ ուղղությամբ»,–նշել է Կարապետյանը:
Նրա խոսքով` տրանսպորտային ցանցի բարեփոխման գործընթացում հնարավոր կնճիռներն ու խոչընդոտները չեն կարող քաղաքային իշխանությանը շեղել դրված նպատակի իրագործումից:
Հայտնել էինք, որ այսօր առավոտվանից հանրային տրանսպորտի մի շարք երթուղիներ չեն աշխատում վարորդների բոյկոտի պատճառով։ Կանգառներում մարդկանց կուտակումներ են, իսկ տաքսիներն էլ բարձրացրել էին սակագները։
Վարորդները պահանջում են աշխատանքային պայմանների բարելավում, մասնավորապես` աշխատավարձի բարձրացում։
Երևանի քաղաքապետարանից արձագանքել էին, որ նմանատիպ սաբոտաժը ծայրահեղ անընդունելի է և չի կարող արդյունք տալ։