ԵՐԵՎԱՆ, 13 դեկտեմբերի – Sputnik. Ազգային ժողովի նախագահի հարցում իշխանությունը միասնական է։ Խորհրդարանական ճեպազրույցների ժամանակ հայտարարեց ՔՊ–ական պատգամավոր Վահագն Ալեքսանյանը` անդրադառնալով ընդդիմության պահանջին։ Նշենք, որ ընդդիմադիրները պահանջում են ԱԺ նախագահ Ալեն Սիմոնյանի հրաժարականը։
«Ընդդիմությունը որքան էլ փորձի էժան քաղաքական դիվիդենտների հետևից ընկնելով` տարատեսակ անպատեհ ու անհեռանկարային նախագծեր բերել ԱԺ, բնականաբար, իշխանության դիրքորոշումը չի փոխվելու»,–ասաց Ալեքսանյանը։
Լրագրողները հետաքրքրվեցին, թե իշխանական պատգամավորները չե՞ն կարծում, որ ավելի լավ է կողմ քվեարկեն Սիմոնյանի հրաժարականի պահանջով ընդդիմադիրների նախագծին, որպեսզի այն օրակարգ մտնի և քննարկվի այս հարցը, քանի որ ընդդիմադիրները նաև կոնկրետ հիմնավորումներ են նշում։
Ի պատասխան ՔՊ–ական մեկ այլ պատգամավոր Արուսյակ Ջուլհակյանը նշեց, որ կարծում է` շատ ավելի կարևոր հարցեր կան քննարկելու։
«Ես չեմ պատրաստվում կողմ քվեարկել Սիմոնյանի հրաժարականի նախագիծն ԱԺ օրակարգ մտցնելուն։ Ինչ վերաբերում է կոնկրետ հիմնավորումներին, որ իբրև թե գերիների մասին հայտարարություններ է անում Սիմոնյանը, որոնք թուլացնում են մեր պետության հիմքերը, ապա կարծում եմ, որ «Հայաստան» դաշինքը գերիների հարցը շահարկում է»,–ասաց Ջուլհակյանը։
Նա նշեց, որ դա է ապացուցում նաև այն հանգամանքը, որ «Հայաստանը» հրաժարվել է միջազգային պատվիրակություններում իր մասնակցությունից, այդ թվում` գերիների հարցն «ուղիղ ադրբեջանցիների աչքերին նայելով» բարձրացնելուց։ Ուստի, ըստ իշխանական պատգամավորի, «Հայաստան» դաշինքը գերիների հարցն օգտագործում է ներքաղաքական դաշտում շոուներ կազմակերպելու համար։
Հիշեցնենք, որ «Հայաստան» խմբակցության քարտուղար Արծվիկ Մինասյանը հայտարարել էր, որ «Պատիվ ունեմի» հետ քննարկել են ԱԺ նախագահի ընդդիմության թեկնածուի հարցը։ «Պատիվ ունեմ» խմբակցության անդամ Թագուհի Թովմասյանն էլ վստահեցրել է` իրենք կողմ են քվեարկելու Սիմոնյանի հրաժարականի նախագծին։