Եթե կա ինքնակամ շինություններն օրինականացնելու գործընթաց, ապա քաղաքացին կարող է եթե ոչ ուղիղ վարչարարությամբ, ապա գոնե դատական կարգով իր ինքնակամ շինությունն օրինականացնել, մինչդեռ եթե քաղաքապետարանի նպատակն է թույլ չտալ ինքնակամ շինարարություն, ապա չպետք է լինեն նաև իրավական սողանցքներ, Sputnik Արմենիայի հետ զրույցում ասաց Երևանի ավագանու «Լույս» խմբակցության ղեկավար Դավիթ Խաժակյանը։
«Անշուշտ, կառավարության այն մտահոգությունը, որ կարող է օրենքի ուժի մեջ մտնելու ժամկետն ազդել ինքնակամ շինությունների քանակի վրա, ճիշտ է, բայց մյուս կողմից, եթե քաղաքային իշխանությունը պայքարում է ապօրինի շինարարության դեմ` իրականացնելով ապամոնտաժման աշխատանքներ, ապա մարդիկ խուսափում են ինքնակամ շինարարությունից` անկախ նրանից, թե ապագայում կկարողանան օրիանականացնել կառուցածը, թե ոչ»,– նշեց Երևանի ավագանու «Լույս» խմբակցության ղեկավարը։
Խաժակյանը մատնանշեց ևս մեկ զսպող հանգամանք` կապված արդեն իսկ եղած ինքնակամ շինությունների հետ՝ հունվարից բարձրացված գույքահարկը. եթե նախկինում մարդիկ իրենց շինությունը պետք է օրինականացնեին, օրինակ, 2 միլիոն դրամով, ապա այժմ այդ թիվը բազմապատկվել է, հետևաբար մարդիկ կարող են չգնալ այդ ճանապարհով և օրենքն ուժի մեջ մտնելու համար սահմանված երկու ամսվա ընթացքում համապատասխան միջոցներ չգտնեն իրենց ինքնակամ շինություններն օրինականացնելու համար։
«Ընդհանրապես միշտ գործել է հետևյալ մոտեցումը` ինչը կառուցվել է հնում, ամիսներ կամ տարիներ առաջ, դրա կարգավիճակը թողնում են ապագային, իսկ նորն արգելում են կառուցել։ Այս տեսանկյունից այն, ինչ քանդվել է վերջին երկու ամիսներին, եղել են նորակառույցներ։ Եղել են բացառություններ, բայց հիմնականում խոսքն առնչվում է նոր շինություններին, այսինքն` քաղաքային իշխանությունն իր գործիքակազմով և բոլոր միջոցներով չպետք է թույլ տա ինքնակամ շինարարություն և չպետք է առաջանա հարց, թե մարդիկ կարող են գնալ դրանց օրինականացման ճանապարհով»,–ասաց «Լույս» խմբակցության ղեկավարը։
Խաժակյանի դիտարկմամբ` կառավարությունը ձգտում է փակել նաև համայնքային հողի վրա հողազավթմամբ իրականացված ինքնակամ շինարարությունները, հետևաբար այդ դեպքում ցանկացած կոշտ միջոց ճիշտ է, քանի որ նման դեպքերը չպետք է տեղ ունենան մեր իրականության մեջ։
Նշենք` ՀՀ կառավարությունը հավանություն է տվել ՀՀ քաղաքացիական օրենսգրքում և հարակից օրենքներում փոփոխություններ և լրացումներ կատարելու մասին օրենքների նախագծերը: Փաթեթով առաջարկվում է բացառել օրենքն ուժի մեջ մտնելուց հետո կառուցված ինքնակամ կառույցների հետագա օրինականացման հնարավորությունը: Մասնավորապես, նախագծերով առաջարկվում է սահմանել երկու ռեժիմ մինչև օրենքն ուժի մեջ մտնելը կառուցված ինքնակամ կառույցների և օրենքն ուժի մեջ մտնելուց հետո կառուցված ինքնակամ կառույցների համար:
Ըստ առաջարկվող մեխանիզմի` հատկապես արագ կարգով պետք է օրինականացման գործընթաց սկսեն այն քաղաքացիները, որոնք ինքնակամ շինություններ են կառուցել 2021թ–ի հունվարի 1-ից հետո` մինչև օրենքի ուժի մեջ մտնելը։ Այդ քաղաքացիներին տրվելու է երկամսյա ժամկետ՝ Կադաստրի կոմիտե դիմելու համար:
Երևան քաղաքում կառուցված ինքնակամ շինությունների օրինականացումը կարող է կատարվել մինչև 2023թ–ի հունվարի 1-ը, ՀՀ այլ քաղաքային համայնքներում` մինչև 2024թ–ի հունվարի 1-ը, իսկ գյուղերում` 2025թ–ի հունվարի 1-ը։