ԵՐԵՎԱՆ, 10 դեկտեմբերի – Sputnik. Միասնական, կազմակերպված ու գրագետ պայքարի արդյունք էր ապօրինությունների այս շղթայի կոտրումը: Նման հայտարարությամբ է հանդես եկել ՀՀ երկրորդ նախագահ Ռոբերտ Քոչարյանն` անդրադառնալով «Հայաստան» դաշինքի՝ կալանքի տակ պահվող պատգամավորներ Արմեն Չարչյանի, Մխիթար Զաքարյանի և Արթուր Սարգսյանի ազատ արձակմանը։
Քոչարյանի խոսքով` 3 պատգամավորների ազատ արձակմամբ արդարությունը վերականգնելու ճանապարհին կարևոր քայլ արձանագրվեց։
«Ի սկզբանե ակնհայտ էր, որ այս հետապնդումը որևէ կապ չունի արդարադատության հետ: Սա այն ակնհայտ ապօրինություններից էր, որը հասկանալի էր անգամ իրավաբանությունից գիտելիքներ չունեցողների, բայց ոչ՝ այսօրվա դատախազության ու որոշ դատավորների համար»,–ասել է Քոչարյանը։
Նա հավելել է, որ շարունակելու են պայքարը, բոլոր շինծու գործերը քանդվելու են։ Քոչարյանը վստահեցնում է՝ ապօրինություն գործած պաշտոնյաները սեփական մաշկի վրա զգալու են իսկական արդարադատության ուժը:
Հիշեցնենք, որ ՍԴ–ն երեկ` դեկտեմբերի 9-ին, հրապարակել էր պատգամավորների անձեռնմխելիության վերաբերյալ «Հայաստան» խմբակցության պատգամավորների դիմումի վերաբերյալ որոշումը: ՍԴ–ն արձանագրել էր` անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից չի կարող պահվել անազատության մեջ և չի կարող զրկվել ազատությունից այլ կերպ, քան ԱԺ համաձայնությամբ:
Այս որոշման հիման վրա էլ այսօր «Հայաստան» դաշինքի պատգամավորներ Արմեն Չարչյանը, Մխիթար Զաքարյանը, Արթուր Սարգսյանն ազատ արձակվեցին։
Չարչյանը մեղադրվում է ընտրողի ազատ կամքի իրականացումը խոչընդոտելու մեջ. Նա կալանավորվել էր օգոստոսի 23-ին։
Մխիթար Զաքարյանը մեղադրվում է խուլիգանություն կատարելու համար։ Հուլիսի 13-ին հայտնի դարձավ, որ նա կալանավորվել է։
Արթուր Սարգսյանին էլ մեղադրանք էր առաջադրվել քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիք)։ Նա նոյեմբերի 15-ին էր կալանավորվել։