ԵՐԵՎԱՆ, 10 դեկտեմբերի – Sputnik. Ադրբեջանական հավակնությունները Արցախի` մեր պատմական հայրենիքի նկատմամբ զուրկ են պատմական ու բարոյական հիմքերից, քանզի Արցախը երբեք Ադրբեջանի մաս չի եղել և չի կարող լինել։ Արցախի Անկախության հանրաքվեի 30-ամյակի, մարդու հիմնարար իրավունքների և Սահմանադրության օրվա առթիվ հղած իր ուղերձում ասում է Արցախի Ազգային ժողովի նախագահ Արթուր Թովմասյանը, տեղեկանում ենք Արցախի ԱԺ պաշտոնական կայքից։
«Ինչպես 1991թ. անկախության հանրաքվեն, այնպես էլ 2006թ. մեր երկրի հիմնական օրենքի` Սահմանադրության ընդունումը մեկ անգամ ևս վկայեցին, որ Արցախի ժողովուրդը վճռական է պաշտպանելու ազատ ապրելու կամքն ու շահերը, պաշտպանելու դրանք միջազգային իրավունքի նորմերին համապատասխան»,–ասում է Թովմասյանը։
Նրա խոսքով` 2020թ․աշնանը սանձազերծած պատերազմով ադրբեջանական քարոզչամեքենան և իշխանական գործիքակազմը Թուրքիայի և ահաբեկչական խմբավորումների մասնակցությամբ փորձել են ավարտին հասցնել Արցախի բնիկ հայության ոչնչացման վաղեմի ծրագիրը։ Սակայն այսօր, ըստ Արցախի ԱԺ նախագահի, թեպետ բզկտված, բայց ունենք Արցախ հայրենիքի մի փոքր մաս։
Թովմասյանը նկատում է` Արցախի լիակատար ազատության, մեր ժողովրդի ոտնահարված իրավունքների վերականգնման պայքարը դեռ ավարտված չէ․ այն դեռ շարունակվում է։
Նա հավելում է` մեր օրերում, երբ վտանգված է Արցախի պետականությունը, հակամարտության վերջնական լուծման կողքին դրվում է նաև Արցախի Հանրապետության ինքնորոշման հիմնախնդիրը։
Հիշեցնենք, որ ճիշտ 30 տարի առաջ՝ 1991 թ․դեկտեմբերի 10-ին, Արցախի Հանրապետությունում անցկացված համահանրապետական հանրաքվեին մասնակցած ընտրողների բացարձակ մեծամասնությունը` 99,89 %–ը, կողմ էր քվեարկել անկախությանը։ Ընտրությանը մասնակցել են ընտրելու իրավունք ունեցող քաղաքացիների 82 %-ը։