ԵՐԵՎԱՆ, 9 դեկտեմբերի – Sputnik․ Ռուս խաղաղապահները վերջնականապես կլուծեն հայ ռազմագերիների վերադարձի հարցը։ ՏԱՍՍ–ին այս մասին ասել է Հարավային ռազմական օկրուգի զորքերի հրամանատարի տեղակալ Ռուստամ Մուրադովը։
8 դեկտեմբերի 2021, 16:44
«Այսօրվա դրությամբ ադրբեջանական կողմի բոլոր զինծառայողները վերադարձվել են, և հայ ռազմագերիների վերադարձի ուղղությամբ աշխատանքները շարունակվում են, դրական միտում կա, կա փոխըմբռնում։ Կարծում եմ, որ այդ հարցն ամբողջությամբ պետք է փակվի։ Եվ ռուս խաղաղապահներն այդ գործն ավարտին կհասցնեն», – ասել է Մուրադովը։
Նա նշել է, որ գերիների վերադարձին ուղղված աշխատանքը գնահատում է որպես խաղաղապահի քաղաքացիական պարտք։
«Որպես զինվորական մարդ` հասկանում եմ, թե ովքեր են ռազմագերիները, ինչ զգացմունքներ են ապրել գերության մեջ գտնվելիս։ Հիշում եմ առաջին չվերթը, երբ Բաքու մեկնեցինք և վերադառնալով` տեսա արդեն Երևանի «Էրեբունի» օդանավակայան ժամանած զինծառայողների դեմքերը։ Արցունքներ էին, նրանք չէին հավատում, որ տուն են վերադարձել», – պատմել է Մուրադովը։
Նա նաև հայտնել է, որ ԼՂ–ում ռուս խաղաղապահների տեղակայման պահից ի վեր Հայաստանի և Ադրբեջանի տեղի իշխանություններին նրանք ավելի քան 1.9 հազար զոհվածի մարմին են վերադարձրել։
Հիշեցնենք, որ դեկտեմբերի 4-ին «Էրեբունի» օդանավակայանում վայրէջք կատարեց 10 հայ ռազմագերիներին Բաքվից տեղափոխող ինքնաթիռը։