ԵՐԵՎԱՆ, 9 դեկտեմբերի – Sputnik. ՀՀ Ազգային ժողովը քիչ առաջ կայացած քվեարկությամբ հաստատեց 2022թ–ի պետական բյուջեի նախագիծը։
Գլխավոր ֆինանսական փաստաթղթին կողմ քվեարկեց 65 պատգամավոր, դեմ` 19, ձեռնպահ` 1։
Նշենք, որ դահլիճում քվեարկության պահին ներկա ընդդիմադիր պատգամավորները դեմ քվեարկեցին նախագծին։
2022թ–ի բյուջեն 2021թ–ի արտահերթ ընտրությունների արդյունքում ձևավորված կառավարության գործունեության 5-ամյա ծրագրի առաջին տարվա բյուջեն է։
Այս տեսակետից ֆինանսների նախարար Տիգրան Խաչատրյանը Sputniik Արմենիային տված հարցազրույցում հաջորդ տարվա գլխավոր ֆինանսական փաստաթուղթը բնորոշել էր իբրև «մեկնարկային»։
Նշենք, որ 2022թ-ին հարկեր-ՀՆԱ ցուցանիշը պետք է բարելավվի 0.9 տոկոսով` մինչև տարեվերջ հասնելով ՀՆԱ-ի 23.4 տոկոսին։
Դեֆիցիտը կկազմի ՀՆԱ–ի 3.2 տոկոսը, իսկ պետական պարտքը` 60.2 տոկոս` տարեվերջին։
Գլխավոր ֆինանսական փաստաթղթի համաձայն` 2022թ–ին Հայաստանի ծախսերը կկազմեն 2 տրիլիոն 188.5 մլրդ դրամ, կամ ՀՆԱ–ի 28.7 տոկոսը, որը 2021թ–ի ծախսերից 18.2 տոկոսով ավելի է։
Կապիտալ ծախսերը նախատեսված են շուրջ 350 մլրդ դրամ, որոնց հիմնական մասը կուղղվեն ոռոգման համակարգի արդիականացման ու ջրամբարաշինության, դպրոցների, մանկապարտեզների կառուցման ու հիմնանորոգման, ինչպես նաև ճանապարհաշինական ծրագրերին։