ԵՐԵՎԱՆ, 8 դեկտեմբերի - Sputnik. Բաղրամյան պողոտայից գերիների ու անհետ կորածների հարազատներից 10 անձ բերման են ենթարկվել։ Տեղեկությունը Sputnik Արմենիային հայտնեցին ՀՀ ոստիկանության հասարակայնության հետ կապերի բաժնից։
«10 անձ բերման են ենթարկվել Վարչական իրավախախտումների վերաբերյալ օրենսգրքի 182–րդ հոդվածի (ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը) հատկանիշներով։ Նրանք ազատ կարձակեն 3 ժամվա ընթացքում»,–նշեցին ոստիկանությունից։
Նշենք, որ գերիների և անհետ կորածների հարազատները փակել էին Բաղրամյան–Դեմիրճյան խաչմերուկը, այսկերպ պահանջելով, որ ԱԺ նախագահ Ալեն Սիմոնյանն ընդունի իրենցից 20 հոգու կամ ինքը գա փողոց` բոլորի հետ հանդիպելու։ Սակայն Աժ–ից իրենց հայտնել են, որ Սիմոնյանը միայն 2 մարդու կընդունի։
Իրավիճակը Բաղրամյան–Դեմիրճյան խաչմերուկում շարունակում է լարված մնալ։
Հիշեցնենք` դեկտեմբերի 7-ին համացանցում հայտնվեց Ալեն Սիմոնյանի մասնակցությամբ գաղտնի նկարահանված մի տեսանյութ, որում ԱԺ նախագահը հայտարարում է` գերիների ծնողներն էլ գիտեն, որ իրենց որդիները դասալքություն են արել։
Ավելի ուշ Ալեն Սիմոնյանը մեկնաբանեց, որ տեսանյութը մոնտաժված է, իր խոսքն էլ կիսատ է ներկայացված։ Այդուհանդերձ, նա վերահաստատեց` բոլոր այն զինծառայողները, որոնք վայր են դրել զենքն ու հանձնվել են գերության, կենթարկվեն քրեական հետապնդման։
Դրանից հետո գերիների և անհետ կորածների հարազատները հավաքվեցին Հանրապետության հրապարակում` կառավարության շենքի մոտ, շիրակցի գերիների հարազատներն էլ բողոքի ակցիա արեցին մարզպետարանի շենքի մոտ։ Նրանց զայրացրել էր Ալեն Սիմոնյանի ասածը։