ԵՐԵՎԱՆ, 8 դեկտեմբերի - Sputnik. ԱԺ նախագահ Ալեն Սիմոնյանն այսօր հանդիպել է գերիների ու անհետ կորածների հարազատների 10 ներկայացուցչի հետ։ Տեղեկությունը Sputnik Արմենիային հայտնեց Սիմոնյանի մամուլի քարտուղար Ծովինար Խաչատրյանը։
«Հանդիպումը սկսվել է ժամը 19։30–ին, ավարտվել 20։30–ին։ Գերիների և անհետ կորածների հարազատները ներկայացրել են իրենց հարցերը և զրուցել առկա խնդիրների վերաբերյալ»,–հայտնեց Խաչատրյանը։
Հիշեցնենք` դեկտեմբերի 7-ին համացանցում հայտնվեց Ալեն Սիմոնյանի մասնակցությամբ գաղտնի նկարահանված մի տեսանյութ, որում ԱԺ նախագահը հայտարարում է` գերիների ծնողներն էլ գիտեն, որ իրենց որդիները դասալքություն են արել։
Ավելի ուշ Ալեն Սիմոնյանը մեկնաբանեց, որ տեսանյութը մոնտաժված է, իր խոսքն էլ կիսատ է ներկայացված։ Այդուհանդերձ, նա վերահաստատեց` բոլոր այն զինծառայողները, որոնք վայր են դրել զենքն ու հանձնվել են գերության, կենթարկվեն քրեական հետապնդման։
Դրանից հետո գերիների և անհետ կորածների հարազատները հավաքվեցին Հանրապետության հրապարակում` կառավարության շենքի մոտ, շիրակցի գերիների հարազատներն էլ բողոքի ակցիա արեցին մարզպետարանի շենքի մոտ։ Նրանց զայրացրել էր Ալեն Սիմոնյանի ասածը։