ԵՐԵՎԱՆ, 7 դեկտեմբերի – Sputnik. Կառավարության դիմաց շարունակվում է անհետ կորածների և գերիների ծնողների ու հարազատների բողոքի ակցիան։ Նրանք իրենց դժգոհությունն են հայտնում ԱԺ նախագահ Ալեն Սիմոնյանի` գերիների վերաբերյալ ասածների առնչությամբ։
Սկզբում ցուցարարները պահանջում էին հանդիպում Սիմոնյանի հետ, իսկ հետո, երբ կառավարության շենքից դուրս եկավ աշխատակիցներից մեկը և խնդրեց իր միջոցով փոխանցել պահանջները, ցուցարարները որոշեցին փակել կառավարության շենքին հարող Տիգրան Մեծ պողոտայի սկզբնամասը։ Այստեղ քաշքշուկ սկսվեց ոստիկանների և ցուցարարների միջև։
«Էս միակ ձևն ա, որ իմ էրեխեն վերադառնա։ Պարոն ոստիկան, դուք դե՞մ եք, որ իմ էրեխեն տուն գա», - կրկնում էր ծնողներից մեկը՝ հարցն ուղղելով ոստիկաններից յուրաքանչյուրին։
Նրանց մեծ մասը անարձագանք թողեց տղամարդու հարցը, բայց մեկը պատասխանեց՝ իհարկե դեմ չենք։
«Բա որ դեմ չեք, թողեք անեմ էն, ինչ կարամ, որ իմ էրեխեն գա տուն։ Եթե չթողեք, ասելու եմ՝ կամերաները անջատեն ու քֆուր անեմ ձեզ», - ասաց ծնողը։
նշենք, որ գերիների հարազատները փակել են Ամիրյան փողոցի մուտքը․ այս պահին երեք փողոց է փակ, երթևեկությունը դադարեցվել է։
Ծնողների մի մասն էլ փորձում է փակել Վազգեն Սարգսյան փողոցը։ Նրանց պահանջը մնում է մեկը՝ ԱԺ նախագահ Ալեն Սիմոնյանը պետք է գա և պատասխան տա իր ասածների համար։
Հիշեցնենք` այսօր` դեկտեմբերի 7-ին, համացանցում է հայտնվել ՀՀ ԱԺ նախագահ Ալեն Սիմոնյանի մասնակցությամբ գաղտնի նկարահանված տեսանյութ, որտեղ ՀՀ ԱԺ նախագահը հայտարարում է, որ գերիների ծնողներն էլ գիտեն` իրենց որդիները դասալքություն են արել։
Ավելի ուշ Ալեն Սիմոնյանը մեկնաբանեց, որ տեսանյութը մոնտաժված է ու իր խոսքը կիսատ է ներկայացված։ Այդուհանդերձ, նա վերահաստատեց` բոլոր այն զինծառայողները, որոնք վայր են դրել զենքն ու հանձնվել են գերության` կենթարկվեն քրեական հետապնդման։