ՄԱԿ-ի Միջազգային դատարանում այսօր հրապարակվող՝ Հայաստանն ընդդեմ Ադրբեջանի հայցի վերաբերյալ որոշումն ընդունելիս դատարանը կաշկանդվածություն և զգուշավորություն կցուցաբերի։ Sputnik Արմենիայի հետ զրույցում ասաց փաստաբան Արա Ղազարյանը։
«Դատարանը պետք է կայացնի այնպիսի որոշում, որ հանկարծ դատարանին չմեղադրեն որոշ հարցերում կանխակալ կարծիք ձևավորելու կամ դիրքորոշում արտահայտելու համար` կապված ապագա վճռի հետ, որը կարող է կայացվել 9 կամ 10 տարի հետո»,- ասաց նա։
Փաստաբանի կարծիքով` միջազգային դատարանը եթե նույնիսկ մասնակի բավարարի Հայաստանի հայցն ընդդեմ Ադրբեջանի, դա ևս չափազանց կարևոր նշանակություն կարող է ունենալ ապագայում սպասվելիք վճռի հարցում։
Ղազարյանը կարծում է, որ միջազգային դատարանը չի բավարարի, օրինակ, գերիների վերադարձի վերաբերյալ միջանկյալ միջոց կիրառելու հարցը, քանի որ դեռ դատաքննության ընթացքում պետք է պարզել` այդ անձինք գերիներ են, թե գերիներ չեն, կամ նրանցից քանիսն են գերիներ և այլն։ Փոխարենը մեծ է հավանականությունը, որ դատարանը կբավարարի գանգատի մեջ տեղ գտած այն կետը, որով պահանջ է ներկայացվել մինչև գործով դատաքննության ավարտը միջոցներ ձեռնարկել Ադրբեջանում գտնվող հայ զինվորների կյանքը, ֆիզիկական, հոգեկան անձռնմխելիությունը, նրանց համար արժանավայել պայմաններ ապահովելու համար։
«Այնքան աղաղակող են խախտումները, որ բացառվում է, որ այս գանգատը Հաագայի դատարանն ամբողջությամբ մերժի։ Կարող է որոշ մասով մերժել, որոշ մասով՝ բավարարել։ Կարծում եմ, որ ՀՀ-ն այդ հաշվարկով էլ ներառել է տարբեր կետերը, որ գոնե մի մասը բավարարվի։ Այսօրվա որոշումը կարող է ուրվագծել տարիներ հետո կայացվող վճռի շրջանակը»,- նշեց Ղազարյանը։
Նրա դիտարկմամբ` Հաագայի դատարանը մասնակի կբավարարի նաև Ադրբեջանի համանման հայցն ընդդեմ Հայաստանի` դարձյալ ոչ ամբողջությամբ։
Հիշեցնենք` ՄԱԿ-ի Միջազգային դատարանը Ադրբեջանի դեմ Հայաստանի հայցի վերաբերյալ որոշումը կհրապարակի այսօր: Այսօր սպասվում է նաև ՄԱԿ–ի դատարանի որոշումը հակառակ հայցի վերաբերյալ` Բաքուն ընդդեմ Երևանի։
Իր հայցում Հայաստանը պահանջում է, որպեսզի դատարանն անհապաղ ազատ արձակի հայ գերիներին, քաղաքացիական պատանդներին և այլ պահված անձանց, որոնք գերեվարվել են 2020 թվականի սեպտեմբեր-նոյեմբեր ամիսներին կամ դրանից հետո զինված բախումների ժամանակ։ Մինչ այդ Ադրբեջանը պետք է նրանց հետ վարվի ռասայական խտրականության բոլոր ձևերի վերացման մասին կոնվենցիայի իր պարտավորությունների շրջանակում։
Բաքուն էլ սեպտեմբերի 24-ին հայց է ներկայացրել, որում պնդում է, թե իբր Հայաստանը մի շարք խտրական գործողություններ է իրականացրել և իրականացնում ադրբեջանցիների դեմ՝ նրանց ազգային և էթնիկ ծագման հիման վրա: