ԱՄՆ-ի համար թիվ մեկ մարտահրավերը ոչ թե Ռուսաստանը կամ Իրանն են, այլ Չինաստանը։ Տնտեսական տարբեր ցուցանիշներով Չինաստանն արդեն իսկ գերազանցում է ԱՄՆ-ին, իսկ մի շարք տարածաշրջաններում Չինաստանի աճող ազդեցությունը լուրջ մտահոգության տեղիք է տալիս Վաշինգտոնին։ Sputnik Արմենիայի հետ զրույցում ասաց Ամերիկյան հետազոտությունների հայկական կենտրոնի տնօրեն Սուրեն Սարգսյանը։
«Չինաստանի և ԱՄՆ-ի միջև մրցակցությունը տեղի է ունենալու ամենատարբեր տարածաշրջաններում` ամենատարբեր ձևերով և մեթոդներով։ Դրանք լինելու են գործընթացներ, որոնք բախվելու են ճանապարհ և գոտի տրամաբանության մեջ։ Երկու գերտերությունների մրցակցությունը լինելու է բավականին կոշտ»,- նշեց նա։
Չինաստանը ԱՄՆ-ի համար առաջնահերթություն է, բայց Վաշինգտոնում նաև Իրանի հետ հարաբերությունները կարգավորելու անհրաժեշտություն են տեսնում։ Ծայրաստիճան լարված հարաբերությունները կարգավորելու նպատակով վերջին օրերի երկկողմ հանդիպումները թեև խոսում են բանակցային գործընթացի մասին, սակայն կարծես թե կողմերին դեռևս չի հաջողվել սայլը տեղից շարժել։
«Եթե կողմերն ընդհանուր համաձայնության չգան, նշանակում է` լարվածությունը շարունակվելու է ոչ միայն երկկողմ հարաբերություններում, այլև Հարավային Կովկասում, մանավանդ եթե հաշվի առնենք, որ Իսրայելից արդեն իսկ հայտարարություններ են հնչում, որ թույլ չեն տա` Իրանը դառնա միջուկային գերտերություն»,- շեշտեց Սարգսյանը։
Միացյալ Նահանգների համար հաջորդ պայթունավտանգ գոտին Ուկրաինան է, որի շուրջ ԱՄՆ-ին և Ռուսաստանի չի հաջողվում ընդհանուր հայտարարի գալ։ Օրերս տեղի ունեցավ ԱՄՆ պետքարտուղար Էնթոնի Բլինկենի և ՌԴ արտաքին գործերի նախարար Սերգեյ Լավրովի հանդիպումը. Բլինկենը բավականին կոշտ արտահայտվեց` ասելով, որ Ռուսաստանը շատ լուրջ խնդիրների կբախվի, եթե պատերազմական գործողություններ սկսի Ուկրաինայի դեմ, Լավրովն էլ իր հերթին հակադարձեց, որ Ռուսաստանը չի պատրաստվում որևէ գործողության դիմել։
«Ուկրաինան լրջագույն խնդիր է դարձել թե՛ Ռուսաստանի, թե՛ ԱՄՆ համար։ Երկու կողմից էլ այնքան մեծ է զինված ուժերի կենտրոնացումը, որ դա կարող է բավականին լուրջ հետևանքներ ունենալ ամբողջ Եվրոպայի համար։ Դրա համար էլ և՛ Եվրոպան, և՛ ԱՄՆ-ն լարվածությամբ հետևում են գործընթացներին` փորձելով ամեն ինչ անել, որ կողմերը չգնան ռազմական բախումների»,- հավելեց Սարգսյանը։
Նշենք, որ ԱՄՆ նախագահ Ջո Բայդենը և ՌԴ նախագահ Վլադիմիր Պուտինը նաև ուկրաինական ճգնաժամը լուծելու հարցը կքննարկեն դեկտեմբերի 7-ին նախատեսված առցանց հանդիպման ժամանակ։