ԵՐԵՎԱՆ, 6 դեկտեմբերի – Sputnik. Հայաստանի Հանրապետության նախագահ Արմեն Սարգսյանը ցավակցական հեռագիր է հղել Էլիզաբեթ Դոուլին ամուսնու՝ ԱՄՆ նախկին սենատոր և նախագահի թեկնածու Ռոբերտ Դոուլի մահվան կապակցությամբ: Տեղեկությունը հայտնում է նախագահի մամուլի ծառայությունը։
«Ցավով տեղեկացա Ձեր ամուսնու՝ անվանի քաղաքական գործիչ Ռոբերտ Դոուլի մահվան մասին: Ամերիկան կորցրեց իր արժանավոր զավակին ու զինվորին, իսկ հայ ժողովուրդը՝ իր մեծ ու հավատարիմ բարեկամին, որը սերտորեն կապված էր հայերիս հետ և միշտ մեր կողքին էր, հատկապես՝ փորձությունների ժամանակ»,– գրել է ՀՀ նախագահը։
Նա նշել է, որ 1988 թվականի ավերիչ երկրաշարժից հետո Ռոբերտ Դոուլն այցելեց Հայաստան և անուրանալի դեր խաղաց մեր երկրին ԱՄՆ-ի ցուցաբերած մարդասիրական օգնության կազմակերպման գործում:
«Անգնահատելի են նաև Հայոց ցեղասպանության ճանաչմանն ուղղված նրա ջանքերը: Ընդունեք, խնդրեմ, մեծարգո տիկին Դոուլ, իմ խորին ցավակցությունն ու վշտակցությունը: Պարոն Դոուլի բարի հիշատակը միշտ վառ կմնա մեր սրտերում»»,– եզրափակել է ՀՀ նախագահը:
Հիշեցնենք` 99-ամյա Դոուլի մահվան մասին հայտնի դարձավ այսօր։
Դոուլին անվանում էին արդարության համար հայերի պայքարի «բացարձակ չեմպիոն»։ Իր ամբողջ կարիերայի ընթացքում նա պաշտպանել է հայերի շահերը։ Հենց նրա ջանքերով է Հայաստանում բացվել «Հազարամյակի մարտահրավերներ» հիմնադրամի գրասենյակը։ Նա նաև լոբբինգ էր անում Հայաստանին ԱՄՆ-ի մշտական տնտեսական գործընկերոջ կարգավիճակ տալու մասին ակտը։
Ամերիկացի քաղաքական գործիչը Ամերիկայի Հայ Դատի հանձնախմբի (ANCA) բարձրագույն պարգևներ է ստացել Հայոց ցեղասպանության ճանաչման համար պայքարում երկարամյա աշխատանքի համար: ՀՀ նախագահ Արմեն Սարգսյանը հայ-ամերիկյան հարաբերությունների ամրապնդման և զարգացման գործում ներդրած ավանդի համար 2019 թ․-ին նրան պարգևատրել է Պատվո շքանշանով: