ԵՐԵՎԱՆ, 5 դեկտեմբերի - Sputnik. Ուկրաինական հարցը հնարավոր է լուծել միայն Մինսկի համալիր միջոցների իրականացման ճանապարհով։ Այս մասին, ՌԻԱ Նովոստիի փոխանցմամբ, այսօր լրագրողներին հայտնել է ՌԴ փոխարտգործնախարար Ալեքսանդր Գրուշկոն։
Փոխարտգործնախարարի խոսքով, բոլորը հասկանում են, որ հուսալի քաղաքական լուծում հնարավոր է գտնել միայն բանակցությունների սեղանի շուրջ։
«Մենք հավատարիմ ենք մնալու հենց այս հանգիստ, ամուր դիրքորոշմանն ու ելնելու ենք նրանից, որ եթե մեր գործընկերներն իսկապես հատաքրքրված են, որ այս հակամարտությունը դուրս գա օրակարգից (խոսքը ոչ միայն Ուկրաինայի մասին է, այլև ընդհանուր առմամբ, համաեվրոպական անվտանգության և սևծովյան տարածաշրջանում անվտանգության մասին), ապա միայն մեկ ճանապարհ կա. շարժվել Մինսկի համալիր միջոցների իրագործման ճանապարհով»,- ասել է Գրուշկոն։
Դոնբասի զոհերի և ավերածությունների մասին ԵԱՀԿ հատուկ մոնիթորինգային առաքելության զեկույցներին առնչվող հարցին անդրադառնալով՝ ՌԴ փոխարտգործնախարարը նկատեց, որ նման փաստաթղթեր շատ հազվադեպ են հայտնվում։
«Մենք հասկանում ենք` ինչու. դա նախևառաջ ձեռնտու չէ նրանց, ովքեր շարունակում են ռազմական գործողությունները Դոնբասում»,- ասել է Գրուշկոն։
Ըստ նրա` զոհերի հարաբերակցությունը մոտավորապես 1-ը 5-ի է։
«Այսինքն ԼԺՀ-ում զոհերն ու ավերածությունները հինգ անգամ շատ են, քան այն կողմում, որը վերահսկվում է ուկրաինական զինված ուժերի կողմից»,- պարզաբանել է ԱԳՆ ներկայացուցիչը։
Ինչպես նշել է փոխնախարարը, այդ փաստը վկայում է այն մասին, թե ով է մեղավոր և ով պետք է պատասխանատվություն կրի։
Հիշեցնենք, որ ավելի վաղ ՌԴ արտգործնախարար Սերգեյ Լավրովը հայտարարել էր, որ Կիևը մտադիր է Մինսկի պայմանավորվածություններին հետևել ըստ իր ցանկության. այդ պատճառով նրան պետք է «ստիպել» կատարել դրանք։ Ըստ նրա, հենց այդ նպատակով է ստեղծվել «նորմանդական ձևաչափը», սակայն Բեռլինն ու Փարիզը դեռ անտեսում են իրենց պարտավորությունները։