ԵՐԵՎԱՆ, 5 դեկտեմբերի – Sputnik. «Դավիթ Համբարձումյան» դաշինքի՝ Մասիս խոշորացված համայնքի ավագանու 2 թեկնածուներին, ինչպես նաև դաշինքի 2 համախոհներին արդեն իսկ ազատ են արձակել։ Տեղեկությունը Sputnik Արմենիային հայտնեցին «Դավիթ Համբարձումյան» դաշինքից։
Դաշինքի ցուցակի երկրորդ համար, Մասիսի համայնքապետի նախկին տեղակալ Նորայր Հակոբյանը Sputnik Արմենիային հայտնել էր` բերման են ենթարկվել ավագանու թեկնածուներ Կարեն Սարգսյանը, Հունան Ավետիսյանն ու ևս երկու համախոհ։
Դաշինքից հայտնեցին, որ 3 ժամ ոստիկանությունում պահելուց հետո ոստիկաններն ազատ են արձակել բերման ենթարկածներին։
Հիշեցնենք, որ ըստ Նորայր Հակոբյանի` կեղծ ահազանգ է եղել, ըստ որի` իբրև թե վերոհիշյալ 4 անձինք խոչընդոտում են ընտրությունների անցկացմանը։ Իսկ իրականում, Հակոբյանի խոսքով, այս ամենի պատճառն այն է, որ իշխանությունն ուզում է վերոհիշյալ անձանց մեկուսացնել իրենց համայնքներից։
Հիշեցնենք, որ դեկտեմբերի 5-ին Հայաստանի 9 մարզի 36 համայնքներում ընթանում են տեղական ինքնակառավարման մարմինների ընտրություններ։
Ժամը 14։00-ի դրությամբ ՏԻՄ ընտրություններին մասնակցել է ընտրելու իրավունք ունեցող քաղաքացիների 20.75 տոկոսը։
Ընտրատեղամասերը կփակվեն ժամը 20.00-ին։