ԵՐԵՎԱՆ, 3 դեկտեմբերի – Sputnik. Ուղիղ մեկ ամիս առաջ ՀՀ Ազգային ժողովում լրագրողները ՀՀ փոխոստիկանապետ Արա Ֆիդանյանից հետաքրքրվել էին, թե ՀՀ քրեական օրենսգրքի 137.1 հոդվածի 2-րդ մասի 2-րդ կետի հատկանիշներով, այսպես ասած, հայհոյանքը քրեականացնող հոդվածով քանի քրգործ կա հարուցված, արդյոք ընդդիմադիրներ կան այդ շարքում, և այս թեմայով մի շարք այլ հարցեր։ Ֆիդանյանը նշել էր` ձեռքի տակ տվյալներ չկան` իր թղթապանակում է ինֆորմացիան։ Սակայն թղթապանակը զննելուց հետո փոխոստիկանապետը հայտնեց, որ, ցավոք, հիմա չունի տվյալներ։ Նա, դիմելով լրագրողներին, ասել էր, որ եթե կարիք կա, գրավոր դիմեն իրեն։
Նույն օրը ոստիկանություն գրավոր հարցում ուղարկեցինք Sputnik Արմենիայից` հետաքրքրվելով, թե քանի քրգործ կա հարուցված, արդյոք դրանք մեծամասամբ հարուցվել են վարչապետին վիրավորելու համար, և ինչ ընթացք ունեն դրանք։ Սակայն որոշ ժամանակ անց գրավոր պատասխան ստացանք, որ անհրաժեշտ է լրացուցիչ աշխատանք կատարել մեր հարցերին պատասխանելու համար, ուստի սահմանված 5-օրյա ժամկետի փոխարեն կպատասխանեն մինչև նոյեմբերի 26-ը։
Ոստիկանության պատասխանը՝ Sputnik Արմենիայի հարցմանը
© Sputnik / Karine Harutyunyan
Այդ ընթացքում հարցումն ուղարկած մեր թղթակցին ոստիկանության մարզային վարչություններից զանգահարում և հետաքրքրվում էին, թե որ դեպքերը նկատի ունի, և արդյոք «այսինչ» դեպքը ներգրավեն հարցման պատասխանի մեջ։ Սակայն որոշ ժամանակ անց ոստիկանությունը մտափոխվեց և որոշեց հարցմանը պատասխանել` շրջանցելով որոշ հարցեր։ Այսպես, ոստիկանությունից հայտնում են, որ այս ընթացքում անձի հանրային գործունեությամբ պայմանավորված` հայհոյանքը քրեականացնող հոդվածով հարուցվել է 18 քրգործ։ Սակայն, «նախաքննության շահերից ելնելով», ոստիկանությունն այլ տեղեկատվություն չի տրամադրել։
Ե՞րբ է առաջացել նախաքննության շահերից ելնելով տեղեկատվություն չտրամադրելու հրամայականը, եթե դրանից մի քանի օր առաջ զանգահարում և ճշտում էին` ինչը ներառեն մեր հարցման պատասխանի մեջ։
Բացի այդ, մեր հարցումն ուղարկելուց հետո 15 օր պահանջվեց, որպեսզի ոստիկանությունը միայն նշի, թե քանի քրգործ է հարուցվել։ Իսկ փոխոստիկանապետի ասածը, փաստորեն, մնաց օդում կախված։