ԵՐԵՎԱՆ, 3 դեկտեմբերի – Sputnik. Հայաստանում բջջային և ինտերնետ կապի օպերատորներից մեկը՝ Ucom ընկերությունը, չափազանց ուշադիր է Հայաստանի հարավային շրջաններում կապի որակի նկատմամբ։ Տեղեկությունը Sputnik Արմենիայի թղթակցին հայտնել է ընկերության մամուլի ծառայության ղեկավար Դիանա Մնացականյանը։
Խոսքը, մասնավորապես, Սյունիքի մարզի որոշ բնակավայրերի մասին է, որտեղ, ինչպես օրերս պատմել է մարդու իրավունքների պաշտպան Արման Թաթոյանը, Կապան-Ճակատեն ավտոճանապարհին ադրբեջանցի զինվորականների հայտնվելուց հետո բջջային կապի խնդիրներ են առաջացել: Այս կապակցությամբ հետաքրքրվեցինք, թե ինչ միջոցներ է ձեռնարկում ընկերությունը կապի խափանումներից խուսափելու, դրանք կանխելու համար։
«Մենք աշխատում ենք օպերատիվ ռեժիմով։ Սյունիքի մարզում, ինչպես երկրի մյուս բոլոր մարզերում, ունենք տեխնիկական խմբեր, որոնք օպերատիվ կերպով արձագանքում են մալուխի, լարերի ցանկացած վնասման, ցանկացած տեխնիկական անսարքության: Ավելին, չնայած Սյունիքում ծագած բարդ իրավիճակին, Ucom ընկերության ոչ մի ալեհավաք չի ապամոնտաժվել, և ծառայությունները մատուցվում են ամբողջ ծավալով։ Իսկ այս փուլում Տանձավեր գյուղում, օրինակ, Ucom - ը ալեհավաք է տեղադրել և ուժեղացնելու է իր ներկայությունն այն տարածքներում, որտեղ դրա կարիքը կա»,-ասել է Ucom-ի ներկայացուցիչը։
Կապի որակի հետ կապված իրավիճակը ցուցադրվում է գործառնական քարտեզի վրա։ Իսկ տեխնիկական անձնակազմը մշտապես վերահսկում է այդ տվյալները։
Ավելի վաղ ՀՀ մարդու իրավունքների պաշտպանը աշխատանքային այցով Սյունիքում էր։ Նա հայտարարել էր, որ ադրբեջանական մաքսակետերի տեղադրման պատճառով հայկական գյուղերը բախվել են սոցիալական, տնտեսական և բժշկական բնույթի բազմաթիվ խնդիրների: Բացի այդ, զրույցի ընթացքում բնակիչները օմբուդսմանին հայտնել էին, որ Կապան- Ճակատեն մայրուղու վրա ադրբեջանցի ուժայինների հայտնվելուց ի վեր վատացել է ինտերնետի և բջջային կապի որակը: Հետագայում դրանում համոզվել է նաև Թաթոյանը։
Հիշեցնենք` Գորիս-Կապան և Կապան-Ճակատեն ճանապարհներին նոյեմբերի 11-ից և նոյեմբերի 15-ից ադրբեջանական մաքսակետեր են տեղադրվել։
Դեռ նոյեմբերի 19-ին Արման Թաթոյանն ընդգծել էր, որ Սյունիքի մարզում Կապան–Ճակատեն ճանապարհին ադրբեջանական անօրինական արարքների հետևանքով 6 գյուղում (Ճակատեն, Շիկահող, Սրաշեն, Ներքին Հանդ, Ծավ, Շիշկերտ. խմբ) անորոշություն է, սրվել են հումանիտար խնդիրները։