«Քաղաքացիական պայմանագիր» կուսակցությունը երբեմն ստիպված է լինում ՏԻՄ ընտրացուցակներում առաջադրել նախկին, նույնիսկ ներկա հանրապետականների, քանի որ իշխող թիմում չկան քաղաքական անցյալ ունեցող թեկնածուներ։ Խոսելով սպասվող ՏԻՄ ընտրությունների մասին` Sputnik Արմենիայի հետ զրույցում նման տեսակետ հայտնեց քաղաքագետ Արմեն Վարդանյանը։
«Հանրապետականների ներկայացուցիչները տարիներ շարունակ մեծ արմատներ են գցել համայնքներում և նրանց հետ շատ դժվար է մրցել։ Հաշվի առնելով դա` իշխանությունը նոր մարտավարություն է որդեգրել` ՀՀԿ շատ ներկայացուցիչների ներառել է իր ցուցակներում, որ նրանց միջոցով ձայներ հավաքի»,- ասաց նա։
Վարդանյանի կարծիքով` այդկերպ, սակայն, ՔՊ-ն հեղինակազրկում է այն արժեքները, որոնք քարոզելով իշխանության եկավ։ Նախկինների օգնությամբ սեփական իշխանությունը պահելու մոլուցքը կարող է անվստահություն առաջ բերել ընտրողների շրջանում։
«Նրանց թվում կան մարդիկ, ովքեր նախկինում արատավոր երևույթների մեջ են թաթախված եղել` ընտրակաշառք են բաժանել, ընտրակեղծարարությամբ են զբաղվել և հիմա բարեհաջող հանգրվանել են ՔՊ կուսակցության ցուցակում, այն դեպքում, երբ այդ կուսակցությունը խոստացել էր նոր մշակույթ, նոր արժեքներ բերել քաղաքական դաշտ»,- նշեց քաղաքագետը։
Վարդանյանի խոսքով` բոլոր ժամանակներում ՏԻՄ ընտրությունները եղել են ավելի շատ անձերի, քան քաղաքական, ծրագրային ընտրություններ։ Մարդիկ շատ հաճախ ընտրություն կատարելիս նախապատվությունը տվել են ծանոթ, բարեկամին, մինչդեռ քաղաքական կուսակցությունների ծրագրային գաղափարախոսության կամ անհատ թեկնածուների ծրագրային դրույթների միջև պայքար և ընտրություն շատ քիչ է եղել։
Վարդանյանը հույս ունի, որ Ընտրական օրենսգրքի վերջին փոփոխությունները, որոնցով պարտադիր պահանջ է ՏԻՄ ընտրություններում կուսակցական ցուցակներով առաջադրվելը, կարող են ընտրություններն ավելի քաղաքական դարձնել, քան նախկինում։ Բայց այստեղ էլ կան լուրջ խնդիրներ և ռիսկեր և չի բացառվում, որ այդ բարեփոխումները միանգամայն հակառակ ազդեցություն ունենան։
Համայնքների խոշորացումից հետո վերջին ՏԻՄ ընտրությունները Հայաստանում անցկացվեցին 3 փուլով` հոկտեմբերի 17–ին, նոյեմբերի 14–ին և 3–րդը կկայանա դեկտեմբերի 5–ին։