ԵՐԵՎԱՆ, 3 դեկտեմբերի – Sputnik. Հայաստանի Հանրապետությունը 2023 թվականի փետրվարից անցում կկատարի հաշմանդամության գնահատման նոր մոդելի, կներդրվի ֆունկցիոնալության աստիճանի գնահատման համակարգ։
Այս մասին հաշմանդամություն ունեցող անձանց միջազգային օրվան նվիրված մամուլի ասուլիսի ժամանակ ասաց ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը։
«Այլևս չի լինի հաշմանդամության դասակարգումն ըստ 3 խմբի (առաջին կարգ, երկրորդ կարգ և երրորդ կարգ)։ Ֆունկցիոնալության աստիճանի գնահատման համակարգով կլինի` թեթև, միջին, ծանր, խիստ ծանր և այլն։ Այսպիսով, գնահատումն իրականացնելու են ոչ միայն բժիշկները, այլև հարբժշկական (բժշկական օգնությանն ու սպասարկմանն օժանդակող ծառայություններ-խմբ.) մասնագետները, ինչը հնարավորություն կտա կարիքները գնահատել ամբողջությամբ»,– նշեց Ստեփանյանը։
Արդյունքում կվերանայվեն սոցիալական աջակցության փաթեթները, որոնք կանխարգելիչ նպատակներով կարող են տրամադրվել նաև հաշմանդամություն ունեցող անձանց ցուցակում չընդգրկված անձանց։
«Շահառուին կարող են տրամադրվել լոգոպեդի, հոգեբանի, անձնական օգնականի և այլ ծառայություններ։ Նոր համակարգը լինելու է ամբողջությամբ էլեկտրոնային` բժիշկների ընտրության ավտոմատացված ընթացակարգով։ Կլինի բժիշկների և հարբժշկական մասնագետների ռեեստր, և փորձաքննությունից 1 օր առաջ, ապանձնավորված, բժիշկները կստանան տեղեկությունը, որ այսինչ տարածքում իրենք պետք է իրենց աշխատանքը կատարեն»,- շեշտեց փոխնախարարը։
Բժիշկները չեն իմանա, թե ում պետք է փորձաքննեն, միայն կծանոթանան նրա հիվանդության պատմությանը։