ԵՐԵՎԱՆ, 2 դեկտեմբերի – Sputnik. Երևանի քաղաքապետարանն այս տարի ամանորյա միջոցառումներ և հրավառություն չի կազմակերպի, փողոցների տոնական լուսավորություն չի լինի, չի գործի քաղաքապետարանի սուրբծննդյան տոնավաճառը: Տեղեկությունը հայտնում է քաղաքապետարանի մամուլի ծառայությունը։
«Միաժամանակ, Ամանորի և Սուրբ ծնունդի կապակցությամբ Երևանի քաղաքապետարանը որոշել է մանուկների համար տեղադրել երկրի գլխավոր տոնածառը Հանրապետության հրապարակում: Տոնածառեր կտեղադրվեն նաև վարչական շրջաններում»,– նշված է հաղորդագրության մեջ:
Երևանի բոլոր առաջին և երկրորդ դասարանցի դպրոցականները քաղաքապետարանից հրավեր կստանան՝ դիտելու ամանորյա մանկական ներկայացումներ:
Հիշեցնենք` անցյալ տարի Հանրապետության հրապարակում տոնածառ չէր տեղադրվել։ Երևանի ավագանին որոշել էր քաղաքի 2020 թվականի բյուջեի վարչական մասի պահուստային ֆոնդից 100 մլն դրամ հատկացնել Ստեփանակերտին։