ԵՐԵՎԱՆ, 2 դեկտեմբերի – Sputnik. Արցախի Հանրապետության մայրաքաղաքում` Ստեփանակերտի զինվորական պանթեոնում, Արցախյան 44–օրյա պատերազմում զոհվածների հիշատակին նվիրված համալիր կառուցելու հարցի շուրջ քննարկումներ են եղել։ Տեղեկությունը հայտնում են Արցախի նախագահի աշխատակազմից։
Նախագահ Արայիկ Հարությունյանի մոտ քննարկմանը մասնակցել են զոհվածների ծնողներ և պատկան մարմինների պատասխանատուներ։
Նշվում է, որ շինաշխատանքներին վերաբերող հարցերի շուրջ դժգոհություններ են եղել զոհվածների հարազատների կողմից, և խորհրդակցությունն իրականացվել է լուծումներ գտնելու համար։
Հարությունյանի խոսքով՝ աշխատանքների ծավալը մեծ է և հանրության կողմից ընկալելի է, որ հնարավոր չէ այն ավարտին հասցնել մեկ տարում, սակայն անընդունելի է, որ նախագծման աշխատանքներն առայսօր ընթացքի մեջ են։
Օրակարգի շուրջ Արցախի նախագահը մի շարք հանձնարարականներ է տվել պատասխանատուներին, նշել նոր աշխատուժի ներգրավման անհրաժեշտության մասին և ընդգծել՝ եթե խոստացված ժամկետներում նախագծման աշխատանքներն ավարտված չլինեն, կկիրառվեն օրենքով նախատեսված խիստ պատժամիջոցներ:
Հանդիպման ընթացքում քննարկվել են նաև այլ հարցեր: