Հուշատախտակ՝ Նովենցի ու Ղազանչյանի հիշատակին. Երևանի ավագանին ընդունեց որոշումը

ԵՐԵՎԱՆ, 30 նոյեմբերի – Sputnik. Երևանի ավագանին որոշեց մայրաքաղաքի կենտրոնում ՀՀ ժողովրդական արտիստ, պրոֆեսոր Երվանդ Ղազանչյանի և ՀՀ ժողովրդական արտիստ, դերասանուհի Գալյա Նովենցի հիշատակները հավերժացնող հուշատախտակ փակցնել։

Նախագիծը ներկայացրեց Երևանի քաղաքապետարանի աշխատակազմի կազմակերպական վարչության պետ Արմինե Վարդանյանը:

«Հուշատախտակը կփակցվի Վազգեն Սարգսյան 7 հասցեում` Հակոբ Պարոնյանի անվան երաժշտական կոմեդիայի պետական թատրոնի շենքի ճակատային մասում»,– նշեց Վարդանյանը։

Միջնորդությունը ներկայացրել է «Հակոբ Պարոնյանի անվան երաժշտական կոմեդիայի պետական թատրոն» ՊՈԱԿ-ի տնօրեն Կարո Շահբազյանը:

«Լուսավոր Հայաստան» խմբակցության ավագանու անդամ Անի Խաչատրյանը հետաքրքրվեց, թե ինչ տրամաբանությամբ են ընտրվում, թե ում հիշատակը հավերժացնող հուշատախտակ պետք է տեղադրվի։ Ընդգծեց, որ անձամբ ինքն արդեն երկար ժամանակ է սպասում է, որպեսզի հայ լրագրող, խմբագիր, արձակագիր, թարգմանիչ Այդին Մորիկյանին նվիրված հուշատախտակ տեղադրվի։

«Մենք բոլոր հուշատախտակների վերաբերյալ նախագծերն ուղարկել ենք ավագանու մշակույթի, կրթության, սոցիալական հարցերի մշտական հանձնաժողովի։ Հարցումներ են ուղղարկվել նաև վարչական շրջաններին, քանի որ եղել են այնպիսի հուշատախտակներ, որոնք առանց փաստաթղթի արդեն փակցված են եղել։ Զտել ենք ամբողջը»,– ասաց Արմինե Վարդանյանը։ Մշակույթի հանձնաժողովից ներկա պահին կա 23 հուշատախտակ տեղադրելու դրական պատասխան, օրակարգ է բերվում հերթականությամբ։

Ինչ վերաբերում է Մորիկյանին նվիրված հուշատախտակին, այն դեռևս էսքիզ չունի։

Որոշումն ընդունվեց 40 կողմ և 1 ձեռնպահ ձայներով։

ՀՀ ժողովրդական արտիստ, պրոֆեսոր Երվանդ Ղազանչյանը ծնվել է 1937 թվականի հունիսի 2-ին, Երևանում: Աշխատել է Երևանի պատանի հանդիսատեսի, Կապանի Ա. Շիրվանզադեի անվան պետական, Երևանի Գաբրիել Սունդուկյանի անվան ազգային ակադեմիական, Լենինականի պետական թատրոններում: Ղազանչյանն աշխատել է նաև Երևանի Հրաչյա Ղափլանյանի անվան պետական դրամատիկական, ինչպես նաև Երևանի պատանի հանդիսատեսի թատրոններում: 1993 թվականից եղել է Երևանի Հակոբ Պարոնյանի անվան երաժշտական կոմեդիայի պետական թատրոնի գեղարվեստական ղեկավարը, այնուհետև տնօրենը: Մահացել է 2019 թվականին, Երևանում:

ՀՀ ժողովրդական արտիստ, դերասանուհի Գալյա Նովենցը ծնվել է 1937 թվականի հուլիսի 10-ին, Երևանում: Եղել է Կապանի, Գյումրիի, Երևանի դրամատիկական թատրոնների, ինչպես նաև Երևանի Գաբրիել Սունդուկյանի անվան ազգային ակադեմիական, Համազգային թատրոնների դերասանուհի: Խաղացել է մոտ 25 ֆիլում («Մենք ենք, մեր սարերը», «Կտոր մը երկինք», «Նահապետ», «Հին օրերի երգը», «Կարոտ», «Ճերմակ անուրջներ», «Գիքոր» և այլն): ՀՀ ժողովրդական արտիստ Երվանդ Ղազանչյանի կինն էր: Մահացել է 2012 թվականին: