ԵՐԵՎԱՆ, 30 նոյեմբերի – Sputnik. Աշխարհահռչակ երգչուհի Ռիհաննան դարձել է Բարբադոսի Հանրապետության ազգային հերոս։ Տեղեկությունը հայտնում է ՌԻԱ Նովոստին։
Նշենք, որ Կարիբյան ծովի արևելքում գտնվող Բարբադոս կղզին պաշտոնապես հրաժարվել է Մեծ Բրիտանիայի թագուհի Եղիսաբեթ 2-րդի գերիշխանությունից՝ դառնալով աշխարհի ամենաերիտասարդ հանրապետությունը:
Ռոբին Ֆենթին, որն աշխարհին հայտնի է Ռիհաննա բեմական անվամբ, ծնվել է Բարբադոսում և երիտասարդ տարիքում տեղափոխվել է ԱՄՆ, որպեսզի սկսի երգչուհու կարիերան:
2018-ի սեպտեմբերին նա նշանակվել է Բարբադոսի արտակարգ և լիազոր դեսպան՝ արտերկրում կղզի–պետության մասսայականացման գործում ներդրած ավանդի համար: Նրա պատասխանատվության տակ են կրթության, զբոսաշրջության և ներդրումների հարցերը։
Այսօր Բարբադոսի մայրաքաղաք Բրիջթաունում Ռիհաննան մասնակցել է հանդիսավոր արարողությանը, որի ժամանակ Դեյմ Սանդրա Մեյսոնը երդում է տվել իբրև նորաստեղծ հանրապետության նախագահ:
«Ձեզ ենք ներկայացնում Բարբադոսի ազգային հերոս, դեսպան Ռոբին Ռիհաննա Ֆենտիին»,-արարողության ժամանակ ասել է վարչապետ Միա Մոթլին՝ իր խոսքը շարունակելով Ռիհաննայի երգերից մեկի խոսքերով։
Նշենք, որ սեպտեմբերի վերջին Բարբադոսի խորհրդարանը միաձայն հավանություն տվեց Սահմանադրության փոփոխություններին, որոնք թույլ են տալիս հրաժարվել կառավարման միապետական ձևից և երկիրը վերածել հանրապետության։Գրեթե մեկ ամիս անց խորհրդարանը կողմ քվեարկեց կղզու գեներալ-նահանգապետ Սանդրա Մեյսոնին առաջին նախագահ նշանակելու օգտին: