Սահմանափակումներին առնչվող որոշումների կամ խստացումների առթիվ տարբեր երկրներում կան տարբեր մոտեցումներ, և այն, ինչ կիրառվում է մեզ մոտ, նորություն չէ։ Այն նպատակ ունի խթանել պատվաստումները, որոնց ցուցանիշով Հայաստանը դեռ ցածր մակարդակում է և դրանով պայմանավորված սահմանափակումները տնտեսության զարգացման համար խոչընդոտ են, Sputnik Արմենիայի հետ զրույցի ընթացքում այս մասին ասաց տնտեսագետ Արմեն Քթոյանը։
«Այն ժամանակ, երբ եվրոպական առևտրային գործընկեր երկրները մեղմացնում են սահմանափակումները, Հայաստանում պատվաստումների ցածր տոկոսի պատճառով մենք հայտնվում ենք ԵՄ–ի համար ռիսկային գոտում, հետևաբար, այս տարբերությունը տնտեսական հարաբերությունները սահմանափակող էական գործոն է դառնում»,– ասաց տնտեսագետը։
Քթոյանի կարծիքով` մենք կարող ենք սահմանափակումների կապակցությամբ արդարացիորեն վրդովվել, ինչ–որ որակումներ տալ, բայց քաղաքակիրթ համարվող աշխարհը սահմանափակումներում որևէ խնդիր չի տեսնում, հաղթահարում է իրավիճակն ու անցնում հաջորդ փուլ, մինչդեռ մենք շարունակում ենք մնալ համավարակային բարդ իրավիճակում` դրանից բխող ամենատարբեր, այդ թվում` տնտեսական հետևանքներով։
«Covid–ի հասցրած վնասն ավելի մեծ է, քան տնտեսական սահմանափակումներինը, այսինքն` տնտեսական կորուստները շատ ավելի պակաս կլինեն, քան այն կորուստները, որոնք պայմանավորված են պատվաստումների ցածր տոկոսով և ամենատարբեր վերլուծությունների համաձայն` տնտեսական ակտիվության տեմպերը փորձում են կապել համավարակի նոր դեպքերի հետ, հետևաբար, մեզանում համավարակի ինտենսիվությունը տնտեսական աճը զսպող գործոն է դարձել»,– ասաց տնտեսագետը։
Տնտեսագետի դիտարկմամբ` նման իրավիճակում տնտեսական գործոնն արդեն ածանցյալ է, և իրավիճակը շտկելու համար նախ անհրաժեշտ է համավարակի տարածման խնդիրը լուծել, որի միակ տարբերակը պատվաստումն է։
Նշենք, որ հունվարի 1-ից Հայաստանում հանրային սննդի վայրերում ու մշակութային միջոցառումներին մուտքը լինելու է միայն պատվաստման վկայականի կամ բացասական թեստի արդյունքի ներկայացմամբ։
Հիշեցնենք` ՀՀ առողջապահության նախարար Անահիտ Ավանեսյանը հայտարարել էր նաև, որ առողջապահության նախարարությունը նախատեսում է մուտքի սահմանափակումներ կիրառել այն երկրների քաղաքացիների համար, որտեղ հայտնաբերվել է կորոնավիրուսի նոր` «Օմիկրոն» շտամը։
Նախատեսվում է արգելել Հարավաֆրիկյան Հանրապետությունից, Բոտսվանայից, Լեսոտոյից, Նամիբիայից, Զիմբաբվեից, Մոզամբիկից, Մադագասկարից և Տանզանիայից քաղաքացիների մուտքը ՀՀ։