ԵՐԵՎԱՆ, 30 նոյեմբերի – Sputnik. Մեծանուն կոմպոզիտոր, դաշնակահար Առնո Բաբաջանյանի 100-ամյակին նվիրված համերգ կկայանա դեկտեմբերի 2-ին, ժամը 19:00 Արամ Խաչատրյան համերգասրահում։ Տեղեկությունը հայտնում է Yerevan Jazz Fest-ի մամուլի ծառայությունը։
«YEREVAN JAZZ FEST 2021» միջազգային 7-րդ ջազ փառատոնի շրջանակներում կազմակերպված համերգին կհնչեն Բաբաջանյանի ստեղծագործությունները՝ ջազային մշակմամբ։
Երեկոյի ընթացքում հանդես կգան Հայաստանի պետական կամերային նվագախումբը (գեղարվեստական ղեկավար և գլխավոր դիրիժոր` Վահան Մարտիրոսյան) և Վահագն Հայրապետյան տրիոն։
Համերգը կղեկավարի դիրիժոր Ռոբերտ Մլքեյանը։ Որպես մենակատարներ հանդես կգան Մավր Մկրտչյանը (բարիտոն), Սոֆյա Սայադյանը (սոպրոնո), Դանիել Մելքոնյանը (շեփոր)։
Կհնչեն Առնո Բաբաջանյանի ստեղծագործությունների ջազային մշակումները, որոնք իրականացրել է Վահագն Հայրապետյանը։ Նախագծի հեղինակն է Կամերային երաժշտության ազգային կենտրոնի փոխտնօրեն Արմեն Սուքիասյանը։
Նշենք, որ համերգը նույն ծրագրով ներկայացվել է Կամերային երաժշտության տան զբոսայգում, ինչպես նաև մարզերում՝ Կապանի մշակույթի կենտրոնում և Վ․ Վաղարշյանի անվան պետական դրամատիկական թատրոնում՝ արժանանալով հանդիսատեսի ջերմ ընդունելությանը։