ԵՐԵՎԱՆ, 29 նոյեմբերի – Sputnik. ՀՀ Սյունիքի մարզի Գորիս խոշորացված համայնքի ղեկավար Առուշ Առուշանյանի վերաբերյալ գործը ստանդարտից դուրս է, բացառապես քաղաքական հետապնդում է իրականացվում։ Այս մասին այսօր, մինչ դատական նիստի մեկնարկը, լրագրողների հետ զրույցում ասաց Առուշանյանի պաշտպան Էրիկ Ալեքսանյանը։
«Վստահ եմ, որ այս գործի շրջանակում կարող են ճնշումներ լինել, սակայն չնայած դրան, պաշտպանական կողմը չի հանձնվում։ Մենք շարունակելու ենք մեր պայքարը. խափանման միջոցի փոփոխման հարցը դեռևս արդիական է»,– նշեց Ալեքսանյանը։
Նա հույս հայտնեց, որ գործ ունեն պրոֆեսիոնալ դատավորի հետ։ Փաստաբանը շեշտեց, որ նախորդ դատական նիստի ժամանակ կայացվել են որոշումներ, որոնք իրենց համար գոհացնող չեն, սակայն չեն կարող դրանով պայմանավորել իրենց վերաբերմունքը դատավորի նկատմամբ։
Հիշեցնենք, որ Առուշ Առուշանյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի 4-րդ մասի 2-րդ կետի (ընտրողի կամքի ազատ իրականացմանը խոչընդոտելը), 149-րդ հոդվածի 2-րդ մասի 4-րդ կետի (պաշտոնեական դիրքն օգտագործելով ընտրական իրավունքի իրականացումը) և 154.2-րդ հոդվածի 3-րդ մասի (քվեարկության գաղտնիությունը խախտելը) հատկանիշներով։
Այս քրեական գործին միացվել է մեկ այլ քրեական գործ, որով Առուշանյանի նկատմամբ որպես խափանման միջոց է կիրառվել գրավը՝ 2 մլն դրամի չափով։
Առուշ Առուշանյանը կալանավորված է 2021 թվականի հուլիսի 16-ից։