ԵՐԵՎԱՆ, 29 նոյեմբերի – Sputnik․ Հովհաննես Այվազովսկու «Ջենովական աշտարակները Սև ծովում» կտավը վաճառվել է Christie’s աճուրդի տան ռուսական արվեստի աճուրդում: 700-900 հազար ֆունտ գնահատված կտավը վաճառվել է 862500 ֆունտ ստեռլինգն, ինչը համարժեք է 1 մլն եվրոյի։ Տեղեկությունը հայտնում է «Իզվեստիա» թերթը:
Կտավը ստեղծվել է հայտնի նկարչի կյանքի վերջին տարիներին։ Մեկ ու կես մետր լայնությամբ կտավի վրա պատկերված է գիշերային ծովափը՝ Թեոդոսիայի ամրոցի մոտ։ Աշխարհահռչակ ծովանկարիչն ապրում էր հենց Թեոդոսիայում։
Արվեստագիտության թեկնածու Սերգեյ Ուվարովի խոսքով՝ աճուրդի արդյունքները վկայում են, որ արտերկրում Այվազովսկու աշխատանքների պահանջարկը կայուն պահպանվում է՝ չնայած ճգնաժամերին: Նա նշում է, որ 1 մլն եվրոն Այվազովսկու համար ռեկորդ չէ։ Ավելի մեծ չափերի ստեղծագործություններ վաճառվել են նաև ավելի բարձր արժեքով։