ԵՐԵՎԱՆ, 25 նոյեմբերի – Sputnik. Նոյեմբերի 22–ին հակառակորդի կրակոցից զոհված ժամկետային զինծառայող Սուրիկ Սաֆարյանը հետմահու պարգևատրվել է Մարտական ծառայության մեդալով: Տեղեկությունը հայտնում են ՀՀ նախագահի մամուլի ծառայությունից։
«Հայրենիքի սահմանները պաշտպանելիս ցուցաբերած խիզախության և անմնացորդ նվիրումի համար ՀՀ պաշտպանության նախարարության N զորամասի ժամկետային պարտադիր զինծառայող, շարքային Սուրիկ Յուրիկի Սաֆարյանին հետմահու պարգևատրել Մարտական ծառայության մեդալով»,–նշված է հաղորդագրության մեջ:
Հավելենք, որ դեպքը տեղի էր ունեցել Գեղարքունիքի մարզի Նորաբակ գյուղի հատվածում տեղակայված հայկական դիրքերում։ Սաֆարյանը թշնամու կրակոցից ստացել էր կրծքավանդակի կողմնային պատի հրազենային միջանցիկ մահացու վնասվածք: Զինծառայողի սպանության դեպքի առթիվ հարուցվել է քրեական գործ։