ԵՐԵՎԱՆ, 25 նոյեմբերի – Sputnik. ՀՀ բարձր տեխնոլոգիական արդյունաբերության նախարար Վահագն Խաչատուրյանն այսօր լրագրողների հետ ճեպազրույցում հայտարարեց, որ իր բջջային հեռախոսին ևս «Apple» ընկերությունից հաղորդագրություն է եկել «Pegasus» լրտեսական ծրագրով հնարավոր գաղտնալսման մասին։
«2 օր առաջ իմ հեռախոսին էլ է այդպիսի հաղորդագրություն եկել։ Ես կարծում եմ, որ ձեր ծանոթներից շատերին հարցնեք, կպարզվի, որ էլի եկել է։ Նշանակում է, որ դա ՀՀ իշխանությունների հետ առնչություն չունի, դա միջազգային հայտնի ընկերություն է, որը միայն մեզ մոտ չէ, որ պրոբլեմ է առաջացրել, շատ երկրների ղեկավարների համար է խնդիրներ առաջացրել։ Իսկ «Apple»–ի նման ընկերությունը, որ ավելի ուշադիր է իր սպառողների նկատմամբ, այդպիսի զգուշացումներ է գրում»,– ասաց Խաչատուրյանը։
Նախարարը նաև հայտնեց, որ ինքը կատարել է «Apple»–ի բոլոր ցուցումները` փոխել է գաղտնաբառերը, թարմացրել է IOS նոր տարբերակը և այլն։
«Մենք գնահատել ենք որպես ՀՀ առանձին քաղաքացիների, գուցե նաև պետական կառույցների անվտանգության նկատմամբ հարձակում կամ հարձակման փորձ»,– ասաց Խաչատուրյանը` նշելով, որ «Pegasus» ծրագրով ՀՀ տարածքում իրականացրած գործողությունների մասին ՀՀ կառավարությունը ներկա պահին տեղեկություններ չունի։
Նա վստահեցրեց, որ «Pegasus» ընկերության հետ ՀՀ կառավարությունը չի համագործակցում։ Ծրագիրը նախարարությունում չեն ուսումնասիրել։
Իսկ «Պատիվ ունեմ» դաշինքի ղեկավար, ԱԱԾ նախկին տնօրեն Վանեցյանի երեկվա հայտարարության հարցով առաջարկեց դիմել նրան` հավելելով, որ վերջինը ենթադրություններ է արել իր ստացած նույնաբովանդակ նամակի վերաբերյալ։
Հիշեցնենք` Վանեցյանը երեկ Facebook-ում գրել էր, որ «Apple» ընկերությունից նամակ է ստացել, որը հաստատում է իր նախկին hայտարարություններն այն մասին, որ Հայաստանի գործող իշխանությունները տևական ժամանակ գաղտնալսման փորձեր են իրականացրել։ Նա նշել էր` փաստացի տվյալներ ունի այն մասին, որ «Pegasus» ծրագրով հարձակումներ են իրականացվել ոչ միայն իր, այլև իր մերձավոր շրջապատի ու ընտանիքի անդամների հեռախոսների վրա։