ԵՐԵՎԱՆ, 23 նոյեմբերի – Sputnik. Ադրբեջանից վերադարձած գերիների գերեվարման փաստի առնչությամբ քրեական գործեր են հարուցված, և քննվում են գերեվարվելու հանգամանքները։ Այսօր ասուլիսի ժամանակ հայտարարեց վարչապետ Նիկոլ Փաշինյանը` պատասխանելով հարցին, թե արդյոք հետաքննություն իրականացվում է այն մարդկանց նկատմամբ, որոնք մինչ օրս վերադարձել են ադրբեջանական գերությունից։
Նոյեմբերի 17-ին Փաշինյանը ԱԺ–ում հայտարարել էր` ժամանակն է, որ գերեվարման յուրաքանչյուր դեպք պատշաճ ձևով հետաքննվի։ Նա նշել էր` ի՞նչ է նշանակում գերի ընկնել, ի՞նչ հանգամանքներում է դա եղել` պետք է քննվի։ Փաշինյանի այս հայտարարությունը քննարկման և քննադատության տեղիք էր տվել։
«Իհարկե, բոլոր դեպքերն էլ պետք է քննվեն։ Զինվորը գերի է ընկնում, և մենք չպե՞տք է քննենք, թե ինչ հանգամանքներում է այն եղել։ Ի վերջո, կներեք, կա օրենք և օրինականություն, և յուրաքանչյուր դեպք պետք է քննվի օրենքի և զինվորական երդման հետ հարաբերության մեջ»,–ասաց Փաշինյանը։
Նրա խոսքով` պետք չէ այդ մասին թմբկահարել, սակայն մոռանալ էլ պետք չէ այս ամենի մասին։ Վարչապետը նշեց, որ կա իրավիճակ, երբ, օրինակ, զինվորը հերոսաբար կռվել է և դիմադրության ոչ ընդունակ վիճակում գերի է հանձնվել։
«Եթե նույնիսկ որևէ մեկը գերի չի հանձնվում, օրինակ` զենքը կորցնելու համար կա որոշակի ընթացակարգ, դա քրեական պատասխանատվություն է ենթադրում։ Այսինքն` այս ամենի մասին պետք է մոռանա՞նք և մոռանանք, որ պետություն ենք, ինչքան էլ շատ ուժեր կան, որ ուզում են այդպես լինի։ Բա զինվորականի երդումն ուղղակի բա՞ն ա»,–ասաց Փաշինյանը։
Նա հավելեց, որ գերեվարման յուրաքանչյուր դեպք պետք է քննվի և այնտեղ, որտեղ առիթ կա քրեական պատասխանատվության ենթարկելու, պետք է դա հետևի։