ԵՐԵՎԱՆ, 23 նոյեմբերի – Sputnik. ՀՀ վարչապետ Նիկոլ Փաշինյանն այսօր լրագրողների ու ՀԿ–ների հետ առցանց հարց ու պատասխանի ընթացքում հռետորական հարց հղեց Թուրքային ու Ադրբեջանին։
«Իրենք ուզո՞ւմ են Հայաստանը ոչնչացնեն, թե՞ չէ։ Իրենք ուզու՞մ են հայ ժողովրդի Ցեղասպանությունը շարունակեն և ավարտին հասցնե՞ն , թե՞ չէ»,– ասաց Փաշինյանը` հավելելով, որ այս հարցերին Թուրքիան ու Ադրբեջանը պետք է պատասխանեն ոչ թե խոսքերով, այլ գործով։
Ըստ ՀՀ վարչապետի, եթե այդ հարցերի պատասխանն «այո» է, Հայաստանին մնում է միայն դիմադրության տարբերակը։
Հակառակ դեպքում, Հայաստանը պատրաստ է հարաբերությունների կարգավորմանը։
«Մենք չենք կարող ուղղակի պայքարից հրաժարվել, բայց մենք դեստրուկտիվ ագրեսիվ, ֆանատիկ չենք ու չենք լինի»,– ասաց նա։
Ընդ որում, Փաշինյանը նաև նկատեց` նրանք, ովքեր Ադրբեջանի ու Թուրքիայի նկատմամբ շտապես վարել են թշնամական քարոզչություն, ցանկանում են, որ Հայաստանը մշտապես մնա մատաղացուի կարգավիճակում։
Նշենք`ՀՀ արտգործնախարարի մամուլի քարտուղար Վահան Հունանյանը հայտնել էր, որ Երևանը դիմել է Մոսկվային՝ միջնորդելու հայ-թուրքական հարաբերությունների կարգավորման գործում։
Հիշեցնենք, որ Արցախյան երկրորդ պատերազմից հետո՝ այս օգոստոսից, Հայաստանի վարչապետն ու Թուրքիայի նախագահը մի քանի անգամ հանդես եկան հայտարարություններով, թե սահմանի մյուս կողմից դրական ուղերձներ են ստանում։ Սեպտեմբերին Թուրքիայի նախագահն անգամ հայտարարեց, թե Հայաստանի վարչապետը Վրաստանի վարչապետի միջոցով իրեն հանդիպելու առաջարկ է արել, բայց հանդիպման համար Երևանը պետք է հստակ քայլեր ձեռնարկի «Զանգեզուրի միջանցքի» ուղղությամբ։