ԵՐԵՎԱՆ, 23 նոյեմբերի – Sputnik. «Տաթև» կրթահամալիրի 10 սանի մոտ նկատվել են աղիքային վարակին բնորոշ ախտանշաններ` սրտխառնոց, փսխումներ։ Տեղեկությունը հայտնում են ՀՀ սննդամթերքի անվտանգության տեսչական մարմնից։
Դեպքի մասին ահազանգը ստացվել է դպրոցի տնօրենի կողմից` նոյեմբերի 23-ին, երեկոյան։
«Ժամը 21։20-ին Ինֆեկցիոն հիվանդությունների ազգային կենտրոն են դիմել նշված կրթահամալիրի 2 երեխա, որոնք հոսպիտալացվել են։ Տնօրենի ահազանգից անմիջապես հետո ՍԱՏՄ տեսուչները «Տաթև» կրթահամալիրում իրականացրել են վերահսկողական միջոցառումներ ու պարզել, որ երեխաները դպրոցում կերել են «Կեսար», «Վինեգրետ» աղցաններ և հավով ու լավաշով ուտեստ»,– նշում են ՍԱՏՄ–ից։
Համաճարակաբանական դիտարկման արդյունքում լաբորատոր հետազոտության նպատակով՝ վերցվել են նմուշներ խմելու ջրից, առկա սննդամթերքից, ինչպես նաև սննդամթերքի հետ շփման մեջ գտնվող մակերեսներից։
Աշխատանքները շարունակվում են։
Ավելի վաղ հայտնել էինք նաև, որ Երևանյան ռեստորաններից մեկում ենթադրաբար թռչնամսից թունավորման դեպք է գրանցվել։ Տեղեկությունը հայտնում են Burgery Angus & more սննդի կետից։ Ստուգումներով պայմանավորված՝ տվյալ ռեստորանը ժամանակավորապես փակ է։