ԵՐԵՎԱՆ, 23 նոյեմբերի – Sputnik. Այսօր լրագրողների ու ՀԿ–ների հետ առցանց հարցուպատասխանի ժամանակ ՀՀ վարչապետ Նիկոլ Փաշինյանը պատասխանեց Sputnik Արմենիայի` խորհրդային տարիների անկլավների վերադարձի մասին վերջին շրջանում շատ քննարկվող հարցին։
Փաշինյանը նախ արձանագրեց, որ Ադրբեջանն այդ հարցը բարձրացրել է ու անգամ 2020թ–ի նոյեմբերի 9-ին փորձ է արել այդ հարցը ևս քննարկման առարկա դարձնել։
«Այստեղ մեր դիրքորոշումը հետևյալն է. մենք պետք է հասկանանք` քարտեզի վրա որ անկլավներ նկարած է, դա ի վերջո ի՞նչ իրավական հիմք ունի, դա իրավական հիմք ունի, թե՞ չունի։ Թե դա ուղղակի քարտեզի վրա արված ուրվագիծ է, և երկու, ասենք, կոլխոզների որոշում, որ այս կոլխոզն իր տարածքից նվիրում է իր եղբայրական Ադրբեջանին և այլն»,– ասաց Փաշինյանը։
Նրա խոսքով` այդ բոլոր հարցերն ի վերջո քննարկման առարկա են դառնալու դեմարկացիայի ու դելիմիտացիայի գործընթացում։ Ընդ որում, Փաշինյանն ընդգծեց, որ Հայաստանը դեմ չէ քննարկմանը` հասկանալու համար դրանց իրավական հիմքի առկայությունը։
«Մենք գիտենք, թե Արծվաշենն ինչ կարգավիճակում է։ Մենք գիտենք նաև , որ աշխարհում կան նման նախադեպեր, երբ անկլավները մնացել են այն երկրների սահմաններում, որով պարփակված են, այո, այդպիսի սկզբունք կա։ Բայց դրանից առաջ մենք պետք է իրավական հիմքերը հասկանանք»,– ասաց Փաշինյանը` հավելելով, որ Հայաստանում այդ հարցը, իրավական հիմքերով հանդերձ քննարկվել է, Հայաստանն ունի իր մոտեցումը, բայց չի ցանկանում որևէ քաղաքական ճնշման ներքո իր համար կարևոր խաղաքարտերը բացել»,– ասաց նա։
Հիշեցնենք` ՀՀ խորհրդարանական արտահերթ ընտրությունների օրերին լուրեր էին շրջանառում, թե Փաշինյանը նոր փաստաթղթ է ստորագրելու, որով Տավուշի մարզի որոշ գյուղեր հանձնելու է Ադրբեջանին։ Խոսքը մասնավորապես Բարխուդարլուի, Սոֆուլուի և Վերին Ոսկեպարի (Յուխարի Ասկիփար) մասին է։ Բոլոր բնակիչները գյուղերը լքել են Արցախյան առաջին պատերազմի ժամանակ։
Քարոզարշավի ժամանակ Փաշինյանը հայտարարել էր, որ Հայաստանը նույնպես Ադրբեջանի տիրապետության տակ գտնվող անկլավներ ունի, օրինակ` Արծվաշենը, որը պետք է փոխանակվի անկլավի հետ։