ԵՐԵՎԱՆ, 23 նոյեմբերի – Sputnik. Ադրբեջանն ագրեսիվ պահվածք է դրսևորում, որը պետք է զսպվի նաև միջազգային լծակներով։ Այսօր ընթացող ասուլիսի ժամանակ հայտարարեց վարչապետ Նիկոլ Փաշինյանը` պատասխանելով նոր պատերազմի վտանգի վերաբերյալ հարցին։
«Միևնույն ժամանակ ցանկանում եմ նշել, որ չենք խուսափում նաև այդ երկրի հետ ուղիղ շփումներից։ Պաշտպանության նախարար Սուրեն Պապիկյանին հանձնարարել եմ ակտիվորեն օգտագործել Ադրբեջանի ՊՆ ղեկավարի հետ կոմունիկացիան ու Ադրբեջանի ԶՈւ կողմից հրադադարի խախտման դեպքերի մասին տեղեկատվություն փոխանակել` առաջարկելով, որ նույնն անի Ադրբեջանը։Կարող եմ ասել, որ Հայաստանի և Ադրբեջանի պաշտպանության նախարարների միջև կապն արդեն ստեղծվել է»,– նշեց Փաշինյանը։
ՀՀ վարչապետը հավելեց, որ ինքը գնահատում է այդ փաստը։
«Ինչքան էլ քննադատենք Ադրբեջանի ագրեսիվությունը, սակայն պետք է գնահատենք փաստը` նախկինում երկու երկրների պաշտպանության նախարարների միջև երբեք ուղիղ կապ չի եղել, առաջին անգամ է նման բան տեղի ունենում։ Դա մի տեսակ իմպրովիզով ստացվեց, երբ մտածում էինք, թե ինչ կարող ենք անել այս հրադադարի խախտումների հետ կապված»,–ասաց Փաշինյանը։
ՀՀ վարչապետն ընդգծեց, որ գնահատում է նաև Ադրբեջանի նախագահի այդ որոշումը, իսկ թե ինչքանով այն արդյունավետ կլինի, ժամանակը ցույց կտա։