ԵՐԵՎԱՆ, 21 նոյեմբերի - Sputnik. Ինչպես մինչև Ամանոր նիհարել։ «Ռիդուս» պարբերականն առաջարկում է առաջնորդվել մասնագետների խորհուրդներով։
Ամեն անգամ սնվելիս պիտակուց կերեք
Սննդակարգում սպիտակուցի բավարար քանակությունը կօգնի ձեզ ազատվել անկառավարելի ախորժակից, հատկապես՝ գիշերը։ Սպիտակուցը մի փոքր կարագացնի նյութափոխանակությունը, ինչպես նաև կպահպանի մկանային զանգվածը:
Բարձրորակ սպիտակուցի աղբյուրներն են տավարի միսը, հավի կրծքամիսը, ձուկը և հունական յոգուրտը: Եթե ինչ-ինչ պատճառներով կենդանական ծագման սնունդ չեք ուտում, ավելի հաճախ օգտագործեք բուսական սպիտակուցով հարուստ մթերքներ՝ լոբազգիներ, տոֆու, ընկուզեղեն և այլ ընդեղեն:
Ճարպեր ու ածխաջրեր
Ցանկացած մարդու, այդ թվում՝ նիհարել ցանկացողի լավ ինքնազգացողության և առողջության համար կարևոր է ոչ միայն սպիտակուցներ, այլև ճարպեր ու ածխաջրեր ստանալ։ Այնպես որ, խորհուրդ չի տրվում լիովին բացառել դրանք առանց բավարար գիտելիքների ու սննդաբանի խորհրդի։ Մի մոռացեք նաև, որ ձեր օրգանիզմին հարկավոր են բջջանյութ, վիտամիններ ու հանքային նյութեր։
Հետևեք ըմպելիքների կալորիականությանը
Հիշեք, որ խմիչքները նույնպես կալորիաներ են պարունակում։ Բացառություն է միայն սովորական ջուրը։ Եթե օրվա ընթացքում օգտագործում եք գազավորված ըմպելիքներ, հյութ, քաղցր թեյ կամ սուրճ հավելումներով (սերուցքով, օշարակներով և այլն), անպայման հաշվեք դրանց կալորիականությունը:
Փոխեք մարզումների ծրագիրը
Քաշի կորուստն արագացնելու համար ամսական մեկ անգամ մի քանի փոփոխություններ կատարեք ձեր մարզումների ծրագրում: Օրինակ՝ կարող եք ավելացնել ուժային վարժությունները, մարզասրահում մի պարապմունքը փոխարինել բռնցքամարտի պարապմունքով կամ ուղղակի ավելացրեք շաբաթվա մեջ պարապմունքների թիվը։
Զանազան ֆիզիկական ծանրաբեռնվածությունները կօգնեն ձեզ խուսափել պլատոյի էֆեկտից․սա մի երևույթի է, որի դեպքում քաշը կանգ է առնում որոշակի մակարդակի վրա ու ոչ մի կերպ չի փոփոխվում։
Լավ քնեք
Քնի պակասը զգալիորեն մեծացնում է շատ ուտելու կամ ուշ երեկոյան ուտելու ցանկությունը: Բացի այդ, քնի պակասը բարձրացնում է կորտիզոլի՝ սթրեսի հորմոնի մակարդակը, որի ավելցուկը կարող է օրգանիզմին ազդանշան տալ, որ ժամանակն է ավելացնել ճարպային պաշարները: Այսպիսով, եթե որոշել եք ազատվել ավելորդ քաշից, առաջին հերթին կարգավորեք քնի ռեժիմն ու սկսեք նորմալ քնել: