ԵՐԵՎԱՆ, 20 նոյեմբերի - Sputnik. ԵԱՀԿ Մինսկի խմբի համանախագահության օրակարգում ԼՂ հակամարտության վերջնական կարգավորման հարցը օրակարգում է։ ՀՀ արտգործնախարար Արարատ Միրզոյանն այդ մասին ասել է ֆրանսիական «Լը Ֆիգարո» (Le Figaro) թերթին տված հարցազրույցում։
«Բայց այս փուլում մենք պայմանավորվեցինք առաջ շարժվել փոքր քայլերով՝ կապված ռազմագերիների ազատ արձակման, հումանիտար նպատակներով Լեռնային Ղարաբաղ միջազգային կազմակերպությունների, այդ թվում՝ ՅՈւՆԵՍԿՕ-ի մուտքի ապահովման հետ, որը նպատակաուղղված կլինի հայկական պատմամշակութային ժառանգության վիճակի վերահսկմանը»,–նշել է նա։
Միրզոյանը շեշտել է, որ Արցախի պատմամշակութային հուշարձանները գտնվում են Ադրբեջանի կողմից դիտավորյալ ոչնչացման սպառնալիքի ներքո։ Նման օրինակ է պատերազմի ընթացքում ԱԹՍ-ների կիրառմամբ Շուշիի Սուրբ Ամենափրկիչ տաճարի ռմբակոծումը։
Նշենք, որ արտգործնախարարը հարցազրույցը տվել է նոյեմբերի 11-ին փարիզյան այցի շրջանակում։ ԱԳՆ–ն հարցազրույցի տեքստը հրապարակել է այսօր։