ԵՐԵՎԱՆ, 19 նոյեմբերի - Sputnik. Ղազախստանի վարչապետ Ասկար Մամինն այսօր Երևանում Եվրասիական միջկառավարական խորհրդի ընդլայնված կազմով նիստի ժամանակ հայտարարեց, որ 2015 թվականից հետո, երբ մեկնարկեց Եվրասիական տնտեսական միության աշխատանքը, ԵԱՏՄ երկրների միջև առևտրային խոչընդոտների մոտ 80%-ը վերացել է:
Մամինը նշեց, որ մնացած խոչընդոտները հետևողականորեն կվերացվեն, այդ նպատակով է կազմվել մինչև 2023 թվականի ժամանակացույցը:
Նա հիշեցրեց, որ ամրապնդվում է նաև առևտրի ֆիզիկական ենթակառուցվածքը։ Մասնավորապես Ղազախստանը շարունակում է կառուցել Դարբազ-Մաքթաարալ երկաթգիծը Ուզբեկստանի հետ կապ ունենալու համար, ինչպես նաև շարունակվում է ընդլայնվել Չինաստանի սահմանին գտնվող Դոստիկ սահմանային կետը: Այս ամենը թույլ կտա ստեղծել Չինաստան–Եվրոպա ցամաքային միջանցք, որը կարող է ավելի արագ ու հուսալի լինել, քան ծովը: Ղազախստանի վարչապետի խոսքով` առևտրի առումով դա կարևոր է ԵԱՏՄ բոլոր երկրների համար:
Հիշեցնենք, որ Եվրասիական միջկառավարական խորհրդի նիստը Երևանում անցկացվում է նոյեմբերի 18-19-ը։ Նիստին մասնակցում են Եվրասիական տնտեսական հանձնաժողովի (ԵԱՏՀ) կոլեգիայի նախագահ Միխայիլ Մյասնիկովիչը և ԵԱՏՄ անդամ երկրների կառավարությունների ղեկավարները` Ռուսաստանի վարչապետ Միխայիլ Միշուստինը, Բելառուսի վարչապետ Ռոման Գոլովչենկոն, Ղազախստանի վարչապետ Ասկար Մամինը, Ղրղզստանի վարչապետ Ալիկբեկ Ժապարովը և ՀՀ վարչապետ Նիկոլ Փաշինյանը։
ԵԱՏՄ-ն միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը: