ԵՐԵՎԱՆ, 18 նոյեմբերի – Sputnik. Մշտական աղմուկը ազդում է նյարդային համակարգի վրա` առաջացնելով նևրոզ, հանգեցնելով հոգեկան անհավասարակշիռ կարգավիճակի, դառնում սրտանոթային հիվանդությունների, հիպերտոնիկ հիվանդության պատճառ։ «Հինգերորդ ալիքի» հետ զրույցում ասել է Մեչնիկովի անվան պետական բժշկական համալսարանի կոմունալ հիգիենայի ամբիոնի վարիչ Կիրիլ Ֆրիդմանը։
Աղմուկը կարող է լուրջ վնաս հասցնել ինչպես մարդուն, այնպես էլ շինություններին` տներ, կամուրջներ, հուշարձաններ։
Եվ իհարկե այն վտանգավոր է մարդու առողջության համար։ Եվ խոսքը միայն լսողության մասին չէ, վստահեցնում է Ֆրիդմանը։ Կյանքն աղմկոտ մեծ քաղաքներում կարող է հանգեցնել նևրոզների և սրտանոթային համակարգի հիվանդությունների, քաղաքային աղմուկը կարող է նույնիսկ սրտի կաթված առաջացնել։
Մեծ քաղաքներում ամենից շատ աղմուկ է ստեղծում տրանսպորտը։ Բնակարանից դուրս լուռ չի լինում ո՛չ գիշերը, ո՛չ ցերեկը։ Նման հետևանքի է հանգեցնում նաև քաղաքի կառուցապատումը` տները շատ մոտ են գտնվում միմյանց։
Աղմուկից պաշտպանվելու համար բժիշկները խորհուրդ են տալիս բնակարաններում ձայնամեկուսիչ պաշտպանություն ապահովել, աշխատանքից տուն վերադառնալ հանգիստ նրբանցքներով, փորձել հնարավորինս քիչ քայլել փողոցներով, ինչը օգտակար կլինի նաև թոքերի համար։