ԵՐԵՎԱՆ, 18 նոյեմբերի – Sputnik. Երեկ ոստիկանությունը պաշտոնապես հաղորդագրություն էր տարածել այն մասին, որ Մյասնիկյան պողոտայում հայտնաբերվել ու մեքենայով հանդերձ ոստիկանության Կենտրոնական բաժին բերման են ենթարկվել երեք տղամարդ՝ 35, 37 եւ 39 տարեկան, երեքն էլ՝ Երևանի բնակիչ։
Խուզարկությամբ նրանցից մեկի մոտից հայտնաբերվել է «Մակարով» ատրճանակ՝ 6 փամփուշտով։
«Ժողովուրդ» օրաթերթի տեղեկացմամբ՝ նրանցից մեկը քրեական աշխարհում հայտնի «Մոնումենտցի Վարդգեսիկ» մականվամբ 39-ամյա Վարդգես Իսպիրյանն է, մյուսը երրորդմասցի «Ռուժ Արթուրիկ» մականվամբ 35-ամյա Արթուր Փոխարյանն է, իսկ մյուսը երրորդմասցի «Արմենչիկ» մականվամբ 37-ամյա Արմեն Հարությունյանն է։
Ըստ պարբերականի՝ Մյասնիկյան պողոտայում բերման ենթարկված երեք տղամարդիկ Երևանում ցանկացել են հանդիպել «օրենքով գող» Անդրանիկ Սողոյանին՝ «Զապին», Մոսկվայից վերջերս Հայաստան վերադարձած «Մասկովսկի Արամչոյին», որը Աժ պատգամավորներից մեկի խնամին է և հեղինակություն է համարվում: Նշվում է, որ իրավապահները բերման են ենթարկել նաեւ «օրենքով գողերին»: