ԵՐԵՎԱՆ, 17 նոյեմբերի – Sputnik. 2021թ–ին Հայաստանում գրանցված գնաճի բարձր մակարդակը պայմանավորված է համաշխարհային տնտեսության իրողություններով։ Այս մասին այսօր ԱԺ–ում 2022թ–ի բյուջեի քննարկման ժամանակ ասաց ՀՀ ԿԲ նախագահ Մարտին Գալստյանը։
«Այս տարի սպեցիֆիկ տարի էր` իր բոլոր դրսևորումներով` պայմանավորված կորոնավիրուսի հետևանքներով, համաշխարհային շուկաներում հիմնական պարենային ապրանքների գների, ինչպես նաև` առաջարկի նկատմամբ պահանջարկի առաջանցիկ աճով։
Առաջարկն ամբողջ աշխարհում, ըստ էության, հետ է ընկնում` կորոնավիրուսով պայմանավորված։ Օրինակ` վերջերս Ռուսաստանի հսկաներից մեկը` «Լադան» դադարեցրեց ավտոմեքենաների արտադրությունը, որովհետև չիպեր չկան աշխարհում։ Այսինքն` չիպ արտադրող գրծարաններն ասում են, որ դրանք շուկայում կհայտնվեն 3 տարի անց»,– ասաց Գալստյանը։
Միաժամանակ աշխարհի շատ երկրներում հանրությանը լրացուցիչ ֆինանսական աջակցություններ են տրվել, առաջացել է փողի ավելցուկ, որը խթանել է պահանջարկը։ Բարձր պահանջարկն ու առաջարկի սակավությունն էլ նպաստել է գների անհամաչափ բարձրացմանը։
Գնաճի երկրորդ պատճառը, ըստ նրա, ամբողջ աշխարհում պարենի բարձր գներն են։ Թանկացման պատճառն էլ բեռնափոխադրումների գների բարձրացումն է ու շատ երկրներում այս տարի ստացված ցածր բերքը։
Հայաստանյան շուկայում 2021թ–փողի ավելացումը ԿԲ նախագահը մեկնաբանում է 2020թ–ի կորոնավիրուսային տարում խնայված փողը ծախսելու հանգամանքով։
«Դա հավելյալ պահանջարկ ստեղծեց, որի արդյունքում մեր գնաճն այս պահի դրությամբ 9.1 տոկոս է»,– հայտնեց Գալստյանը` հիշեցնելով, որ գնաճը զսպելու համար ԿԲ–ն տարվա ընթացքում արդեն մի քանի անգամ բարձրացրել է վերաֆինանսավորման տոկոսադրույքը։
«Մենք ակնկալում ենք, որ տարեվերջին կունենանք գնաճ, որը կգերազանցի մեր թիրախը, բայց լիահույս ենք, ու բոլոր ջանքերն արդեն գործադրված են, որ, եթե նոր ռիսկեր ի հայտ չգան, մենք մյուս տարի կվերադառնանք մեր թիրախին»,– ասաց Գալստյանը։
Հիշեցնենք` ԿԲ հաստատած վերաֆինանսավորման տոկոսադրույքն այս պահին ՀՀ–ում անփոփոխ է՝ 7.25% է։ Այն վերջին անգամ բարձրացվել էր սեպտեմբերին` 7 տոկոսից դառնալով 7.25%: Այդ պահին, ԿԲ գնահատմամբ, 12–ամսյա գնաճը` 2020–ի համեմատ կազմում էր 8.9%։