ԵՐԵՎԱՆ, 16 նոյեմբերի – Sputnik. SARS-CoV-2-ի դեմ նազալային պատվաստանյութի կիրառման դեպքում ոչ մի կողմնակի ազդեցություն չի հայտնաբերվել։ Տեղեկությունը ՌԻԱ Նովոստիին հայտնել է Գամալեայի անվան համաճարակաբանության և մանրէաբանության ազգային-հետազոտական կենտրոնի տնօրեն Ալեքսանդր Գինցբուրգը:
«Նազալային պատվաստանյութի դեպքում այսօրվա դրությամբ ոչ մի կողմնակի ազդեցություն չենք նկատել», - ասել է նա:
Հոկտեմբերի կեսերին հայտնի է դարձել, որ Ռուսաստանի առողջապահության նախարարությունը թույլատրել է Գամալեայի կենտրոնի մշակած Spray 08-Գամ-Կովիդ-Վակ-2021-ի կլինիկական հետազոտությունները:
Գինցբուրգը նաև նշել է, որ պատվաստման փոխարեն COVID-19-ի դեմ այդ դեղամիջոցի օգտագործման հարցը կորոշեն կլինիկական հետազոտություններով, այդ հարցը դեռ միանշանակ պատասխան չունի:
Գիտնականի խոսքով՝ նազալային պատվաստանյութով պետք է պատվաստվել առավելագույնը կես տարին մեկ, հնարավոր է՝ ավելի հազվադեպ, բայց այդ հարցը դեռ պետք է ուսումնասիրվի:
Պատվաստումը մնում է կորոնավիրուսից պաշտպանվելու ամենահուսալի միջոցը։ ՌԴ առողջապահության նախարար Միխայիլ Մուրաշկոյի խոսքով՝ COVID-19-ով ծանր հիվանդների շրջանում պատվաստվածների տոկոսը 0,03%-ից քիչ է, իսկ հիվանդանոցներում հիվանդների ճնշող մեծամասնությունը պատվաստված չեն: Սեպտեմբերի վերջին ԱՀԿ-ում հայտնել էին SARS-CoV-2-ից մահացության և պատվաստումից հրաժարվելու կապի մասին։