ԵՐԵՎԱՆ, 16 նոյեմբերի - Sputnik. ՀՀ քաղաքացիություն չունեցող անձինք դեկտեմբերի 1–ից Հայաստան ժամանելիս պարտադիր պետք է ունենան Covid-19–ի բացասական պատասխանով ՊՇՌ թեստ: Օդանավակայանում թեստավորման հնարավորություն չի լինի: Տեղեկությունը հայտնում է «Զվարթնոց» օդանավակայանի մամուլի ծառայությունը։
«ՀՀ մուտք գործելիս անձը պետք է ունենա 72 ժամը չլրացած ՊՇՌ թեստի արդյունք։ Պատվաստվածների դեպքում պետք է ներկայացնել առնվազն 14 օր առաջ ամբողջական պատվաստման սերտիֆիկատ»,– Հանրային հեռուստաընկերության հետ զրույցում ասել է «Զվարթնոց» միջազգային օդանավակայանի ՍԲՀԿ բժիշկ–համաճարակաբան Հրաչյա Վարդանյանը։
Նշենք, որ մինչև դեկտեմբերի 1–ը ինչպես ՀՀ քաղաքացիների, այնպես էլ օտարերկրացիների համար կպահպանվի օդանավակայանում թեստավորման հնարավորությունը։