ԵՐԵՎԱՆ, 15 նոյեմբերի – Sputnik. Վերաքննիչ քրեական դատարանը` Արմեն Դանիելյանի նախագահությամբ, ՀՀ ԱԺ «Հայաստան» խմբակցության պատգամավոր, Սիսիանի նախկին համայնքապետ Արթուր Սարգսյանին կալանավորելու որոշում է կայացրել։ Տեղեկությունը Sputnik Արմենիային հայտնեց Սարգսյանի պաշտպան Էմին Խաչատրյանը։
«Նման որոշում է կայացվել, սակայն մենք անգամ ծանուցված չենք եղել տեղի և ժամի մասին։ Ո՛չ ես, ո՛չ էլ իմ պաշտպանյալը։ Ի սկզբանե դատավոր Տիգրան Սիմոնյանի աշխատակազմից մեզ հետ կապ էին հաստատել և ասել, որ բողոքը գտնվում է իրենց վարույթում, սակայն ինչ–ինչ հանգամանքներում գործը հետագայում հայտնվել է դատավոր Արմեն Դանիելյանի մոտ»,– նշեց պաշտպանը։
Նա ընդգծեց, որ նիստը կարծես թե բավականին հրատապ է նշանակվել ու անցկացվել, միևնույն ժամանակ այն կայացել է առանց իրենց ծանուցելու։ Խաչատրյանը շեշտեց` ստացվում է, որ որևէ կարծիք ու դիրքորոշում հայտնելու հնարավորություն ստեղծված չի եղել իր և պաշտպանյալ Արթուր Սարգսյանի համար։ Բեկանվել է առաջին ատյանի` 20 մլն դրամի դիմաց ազատ արձակելու որոշումը։
Որոշումը ստանալուց հետո անմիջապես պատրաստվում են այն բողոքարկել Վճռաբեկ դատարանում։
Խաչատրյանի խոսքով` դատավոր Արմեն Դանիելյանը խախտել է քրեական օրենսդրության բոլոր սկզբունքները, այդ թվում` արդար դատաքննության, մրցակցության և այլն։
Պատրաստվում են նաև վստահորդի և այլ փաստաբանների հետ քննարկումներից հետո հանցագործության մասին հաղորդում ներկայացնել ակնհայտ ապօրինի դատական ակտ կայացնելու վերաբերյալ։
Հիշեցնենք, որ Արթուր Սարգսյանը պատգամավորական մանդատ էր ստացել «Հայաստան» դաշինքի ցուցակով արտահերթ ընտրություններին մասնակցության արդյունքում։ Հուլիսի 13-ին ՀՀ գլխավոր դատախազությունը կենտրոնական ընտրական հանձնաժողով միջնորդություն էր ներկայացրել Արթուր Սարգսյանին անձեռնմխելիությունից զրկելու համար: Հուլիսի 15-ին ԿԸՀ–ն բավարարել էր միջնորդությունը, և Սարգսյանը ձերբակալվել էր։
Արթուր Սարգսյանին մեղադրանք էր առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիքը)։
Սարգսյանը նախկինում Սիսիան համայնքի ղեկավարն էր, նա հոկտեմբերին 20 մլն գրավի դիմաց ազատ էր արձակվել: Հոկտեմբերի 26-ին առաջին անգամ մասնակցել էր Ազգային ժողովի նիստին։ «Հայաստան» խմբակցության պատգամավորները նրան հոտնկայս ու ծափահարություններով էին դիմավորել։