ԵՐԵՎԱՆ, 14 նոյեմբերի – Sputnik. Հայ-ադրբեջանական սահմանի արևելյան ուղղությամբ կատարվող իրադարձություններն ադրբեջանական կողմի ճնշումների շարունակությունն է, նրանք նպատակ ունեն դեպի Նախիջևան միջանցք ստանալ։
Sputnik Արմենիայի հետ զրույցում նման կարծիք հայտնեց ՀՀ ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը։
«Այս ամենը շարունակությունն է այն ճնշումների, որն այսօր ադրբեջանական կողմը և թուրք-ադրբեջանական տանդեմն իրականացնում են ՀՀ-ի նկատմամբ՝ փորձելով ներխուժել և իրենց համար հարմար պայմաններ ստեղծել դեպի Նախիջևան միջանցք ստեղծելու համար»,- նշեց Օհանյանը։
Նրա խոսքով՝ պատճառը ՀՀ պարտված իշխանություններն են, որոնք ոչ մի միջոց չեն ձեռնարկում հայի արժանապատվությունը պահպանելու համար։
Հարցին, արդյոք տեղեկություն ունի հայկական կողմի 1-2 կմ հետ քաշվելու վերաբերյալ, նա նշեց, որ նման ինֆորմացիայի չի տիրապետում։
Օհանյանը կարծում է, որ այժմ գործողությունները կատարվում են Սյունիքի մարզի Իշխանասարից դեպի ձախ ընկած հատվածում, դեպի Ջերմուկ։
Հիշեցնենք, որ այսօր` նոյեմբերի 14-ին, ժամը 13։00-ի սահմաններում, ադրբեջանական ԶՈւ ստորաբաժանումները փորձել են դիրքային առաջխաղացում ապահովել հայ-ադրբեջանական սահմանի արևելյան ուղղությամբ։ Սկսվել է ինտենսիվ փոխհրաձգություն։ Պաշտպանության նախարարությունից վստահեցրել են, որ հայ դիրքապահները կանխել են հակառակորդի փորձերը՝ դիրքավորվել այդ տարածքում։ Իրադրությունը դեռևս շարունակում է լարված մնալ։
Նոյեմբերի 10-ին էլ Հանրային հեռուստաընկերությանը տված հարցազրույցի ժամանակ ՀՀ անվտանգության խորհրդի քարտուղար Արմեն Գրիգորյանը հայտարարել էր, որ գիշերը Գորիս-Կապան ճանապարհին Ադրբեջանը մաքսակետեր է տեղադրելու։
Ընդգծել էր նաև, որ հայկական կողմը նույնպես համապատասխան քայլեր կձեռնարկի, այսինքն՝ ճանապարհի այդ հատվածում կտեղադրի մաքսային և սահմանային հսկողության գործառույթներ իրականացնող կետեր։
ՀՀ վարչապետ Նիկոլ Փաշինյանը կառավարության նիստում հայտարարեց, որ Ադրբեջանի երեկվա ծանուցումից հետո, թե իրենք պատրաստվում են մաքսատուրք գանձել նշված ճանապարհով անցնող ՀՀ քաղաքացիներից, իրենք որոշել են հրաժարվել այդ ավտոճանապարհից ու ՀՀ քաղաքացիներին ուղղորդել երթևեկել այլընտրանքային` Կապան–Աղվանի–Տաթև–Հալիձոր–Շինուհայր ճանապարհով։