Հայաստանում պետական կառավարման համակարգում աշխատելն ավելի գրավիչ է, քանի որ աշխատողն այստեղ իրեն ավելի ապահով է զգում։ Սակայն պետական ապարատում մասնագետը շատ արագ դեգրադացվում է, քանի որ ստիպված է անշեղորեն կատարել կոնկրետ հանձնարարականներ։ Sputnik Արմենիայի հետ զրույցում նման կարծիք հայտնեց ՀՀ գործատուների միության նախագահ Գագիկ Մակարյանը։
«Շենքը կա, անվտանգությունը կա, մարդը ստանում է բավականին բարձր աշխատավարձ և սկսում է հեզորեն կատարել վերադասի հանձնարարականները` շատ դեպքերում անգամ սեփական սկզբունքներին դեմ գնալով, որովհետև հակառակ դեպքում իրեն կարող են պատժել կամ աշխատանքից հեռացնել։ Քանի որ ինքը լավ ու ապահով տեղ է գտել, ոչ մի գլխացավանք չունի՝ սկսում է ստիպված ամեն ինչը գործատուի սրտով անել, որ այդ աշխատանքը չկորցնի»,- ասաց նա։
Մակարյանի խոսքով՝ այսկերպ մասնագետը կարճ ժամանակ անց կորցնում է իր նախաձեռնողականությունը, սկզբունքայնությունը, քննադատական ու ստեղծագործական միտքը և շատ հաճախ պետական համակարգից հեռացած ռոբոտացած աշխատակիցը/մասնագետը չի կարողանում կամ մեծ դժվարությամբ է աշխատանք գտնում մասնավոր հատվածում։
«Մասնավոր սեկտորում ինքը պետք է փորձի կոնկրետ հարցի շուրջ կոնկրետ գիտելիքներ դրսևորել կամ ինքնուրույն գործել, նախաձեռնող լինել։ Սակայն նախկինում կաղապարված հանձնարարականներ կատարելով` նոր միջավայրում արդեն ի վիճակի չէ դա անել»,- նշեց նա։
Բացի այդ՝ մասնավոր հատվածում աշխատավարձերն էլ համեմատաբար ցածր են։ Ուսումնասիրությունը ցույց է տվել, որ մանավանդ վերջին երկու տարում այստեղ աշխատավարձերի բարձրացումներ հազվադեպ են լինում։
Մակարյանի դիտարկմամբ՝ կորոնավիրուսի համավարակն ու պատերազմը բացասաբար են անդրադարձել համակարգի բոլոր ճյուղերի վրա՝ եկամտաբերությունը նվազել է, արտադրողականությունը պակասել, իսկ եղած եկամուտներով հնարավոր չէ աշխատավարձ բարձրացնել։