ԵՐԵՎԱՆ, 12 նոյեմբերի – Sputnik. Հայաստանի ՔԿՀ–ներում ազատազրկված շուրջ 2100 անձանցից 55–ն այսօր վարակված են կորոնավիրուսով։ Այս մասին Sputnik Արմենիայի հետ հարցազրույցում հայտնեց ՀՀ արդարադատության նախարար Կարեն Անդրեասյանը։
«Սա իմ կարծիքով ահագնացող տոկոս է, և ինչնպես ամբողջ հասարակությունում, այնպես էլ ՔԿՀ–ներում մենք պիտի ստիպված լինենք որոշակի խստացումների գնալ։ Հակառակ դեպքում վարակը սարսափելի տեմպերով տարածվում է»,– ասաց Անդրեասյանը։
Նշենք, որ ՔԿՀ–ներում վարակի գրանցված ընդհանուր դեպքերը մինչ օրս 83-ն են եղել, ինչը նշանակում է, որ վեջրին շրջանում գրանցված 55 դեպքը ամենաբարձր ցուցանիշն է։
Նոյեմբերի 3-ի դրությամբ ՔԿՀ–ներում վարակվածների թիվը 49-ն էր։ Եվս 1 հիվանդ դատապարտյալ նոյեմբերի 1-ին մահացել էր։
Հիշեցնենք` նոյեմբերի 11-ի նիստում ՀՀ կառավարությունը որոշում էր ընդունել ՀՀ–ում սահմանված կորոնավիրուսի կարանտինային սահմանափակումները մինչև 2022 թվականի հունիսի 20-ը երկարաձգելու մասին։ Ի թիվս այլ սահմանափակումների, մինչև 2022–ի ամառ ուժի մեջ կմնա նաև քրեակատարողական հիմնարկներում երկարաժամկետ տեսակցությունների արգելքը։