Դավաճանություն` հասարակության թիկունքում. ընդդիմությունը բողոքի ակցիա է իրականացնում

Ոստիկանները հսկում են կառավարության շենքըստան» դաշինքի առանձին պատգամավորներ այսօր հավաքվել են կառավարության շենքի մոտ և բողոքում են Գորիս-Կապան ավտոճանապարհին ադրբեջանական մաքսակետերի տեղակայման դեմ:

Ցուցարարները Հայաստանի իշխանություններին մեղադրում են ազգային շահերին դավաճանելու և պարտվողական դիրքորոշման համար։ Նրանք նշում են, որ մաքսակետերի տեղակայումը տեղի է ունեցել Հայաստանի և Ադրբեջանի իշխանությունների միջև փոխադարձ համաձայնությամբ, հայ հասարակության թիկունքում։

«Հայաստան» դաշինքի պատգամավոր, ՀՅԴ ներկայացուցիչ Գեղամ Մանուկյանը նշեց, որ Հայաստանի իշխանությունները՝ «վարչապետի պաշտոնը զբաղեցնող մարդու» գլխավորությամբ, հակառակորդին թույլ են տվել Հայաստանի տարածքում մաքսակետեր տեղակայել:

Նախօրեին հանրային հեռուստատեսությանը տված հարցազրույցում ՀՀ Անվտանգության խորհրդի քարտուղար Արմեն Գրիգորյանը հայտնել էր, որ կեսգիշերին ադրբեջանական կողմը մաքսակետեր կտեղադրի Գորիս-Կապան ճանապարհահատվածում: Միաժամանակ նա նշել էր, որ հայկական կողմը «պատասխան քայլեր կձեռնարկի և նույնպես մաքսային կետեր կտեղակայի»:

Մանուկյանի խոսքով՝ անհասկանալի է, թե ինչպես կարող են նրանք այդքան հանգիստ և անգամ որոշակի հպարտությամբ խոսել Հայաստանի տարածքում ադրբեջանական անցակետերի տեղակայման մասին։ Դաշնակցականը նման պահվածքը համարում է դավաճանություն, դավաճանություն հայրենիքի շահերին և «կապիտուլյանտություն»։ Նրա խոսքով` եթե այնքան ոստիկաններ, որքան հիմա կանգնած են կառավարության շենքի մոտ և հսկում են կառավարության անդամներին, կանգնեին Սյունիքում՝ մայրուղու վրա, ապա ոչ ոք չէր համարձակվի մաքսակետեր դնել Հայաստանի տարածքում:

Մանուկյանը համարում է, որ ՀՀ քաղաքացիների պարտքն է իշխանություններից հաշվետվություն պահանջել «դավաճանական քայլերի» համար։

Հիշեցնենք, որ սեպտեմբերի առաջին կեսին Գորիս-Կապան ճանապարհի որոշ հատվածներում տեղակայված ադրբեջանցի ոստիկանները սկսել էին կանգնեցնել իրանական բեռնատարների վարորդներին և գումար պահանջել։

Ճանապարհը մասնակիորեն ադրբեջանական վերահսկողության տակ է հայտնվել անցյալ տարվա դեկտեմբերին, երբ վարչապետի որոշմամբ հայկական ուժերը հեռացան Սյունիքի բնակավայրերի դիմաց գտնվող մի շարք դիրքերից։