ԵՐԵՎԱՆ, 11 նոյեմբերի – Sputnik. ՀՀ մարդու իրավունքների պաշտպան Արման Թաթոյանը ՀՀ Անվտանգության խորհրդի քարտուղարից պարզաբանումներ է պահանջում Գորիս–Կապան ավտոճանապարհին այս գիշեր Ադրբեջանի մաքսակետեր տեղադրելու հետ կապված։ Այս մասին նա գրել է Facebook-ի իր էջում։
«Հրապարակային անակնկալով հանդես եկած պաշտոնատար անձը, որպես ՀՀ անվտանգության խորհրդի քարտուղար, պարտավոր է պարզաբանումներ տալ»,–գրել է նա ու թվարկել պարզաբանման ենթակա հարցերը։
1. ինչպե՞ս է պատկերացնում Գորիս-Կապան ճանապարհին ադրբեջանական սահմանային ու մաքսային վերահսկողության պայմաններում մարդկանց և ապրանքների ազատ ու անվտանգ տեղաշարժը,
2. արդյոք գիտակցո՞ւմ է, որ այս գործառույթները ենթադրում են ՀՀ բնակիչների իրավունքների սահմանափակումներ ադրբեջանական իրավապահ մարմինների կողմից. մարդկանց ենթարկել տուգանքների, հարուցել քրեական գործեր, բերման ենթարկել ու ձերբակալել, ենթարկել խուզարկությունների և այլն,
3. ինչպե՞ս են Գորիս-Կապան ճանապարհով երթևեկող ՀՀ բնակիչները (հարակից գյուղերի) կամ օտարերկրացիները պաշտպանելու իրենց իրավունքները (օրինակ՝ ու՞մ և ի՞նչ ընթացակարգերով են դիմելու) և ինչպե՞ս է պատկերացնում ադրբեջանական օրենսդրության կիրառումը նրանց նկատմամբ,
4. ինչպե՞ս է ապահովվելու իրավունքների խախտումներ թույլ տվող ադրբեջանական սահմանային ու մաքսային մարմինների պատասխանատվությունն ու պատիժը:
«Իրականում, ադրբեջանական զինված ծառայողների, իրավապահ մարմինների ներկայությունն ու առավել ևս նրանց արարքները ՀՀ ճանապարհներին անօրինական են (զուրկ են իրավական հիմքերից) ի սկզբանե»,–հետգրության մեջ նկատել է Թաթոյանը:
ՀՀ ՄԻՊ–ն ընդգծել է, որ պետք է ոչ թե հայտարարություններով լեգիտիմացնել նրանց ներկայությունն ու արարքները, այլ աշխատանքներ տանել նրանց հեռացնելու ուղղությամբ:
Հիշեցնենք, որ երեկ` նոյեմբերի 10–ին, ՀՀ ԱԽՔ Արմեն Գրիգորյանը Հանրային հեռուստաընկերությանը տված հարցազրույցի ժամանակ հայտարարել է, որ Գորիս–Կապան ճանապարհին Ադրբեջանն այս գիշեր մաքսակետեր կտեղադրի։