ԵՐԵՎԱՆ, 10 նոյեմբերի – Sputnik. Հայաստանի Հանրապետության Կոտայքի և Արմավիրի մարզերում նոր տրանսպորտային համակարգ կներդրվի։
Այս մասին պաշտոնավարման 100 օրն ամփոփելիս ասաց ՀՀ տարածքային կառավարման և ենթակառուցվածքների նախարար Գնել Սանոսյանը։
«Մենք վերջապես կարողացանք մարզերում տրանսպորտային ցանցի մրցույթներ հայտարարել։ Երկու մարզում է հաջողվել՝ Կոտայքի (մրցույթն ավարտվել է հոկտեմբերին) և Արմավիրի (ավարտվել է նոյեմբերի 9-ին)։ Առաջին մրցույթին մասնակիցներ չկային, ստիպված բաժանել ենք 2 լոտի, արդեն մասնակիցներ կան, գործընթացն էլ առաջ կգնա»,- նշեց Սանոսյանը։
Նախարարը շեշտեց, որ երկու մարզն էլ կհամալրվեն նոր ավտոբուսներնով ու միկրոավտոբուսներով, կլինեն տարբեր երթուղիներ, որոնք կսպասարկեն բոլոր համայնքները։
Նա նաև ընդգծեց, որ երկաթուղային ոլորտում էլ օգոստոսին գնացքի վագոններ են բերվել, որոնք ամբողջովին նոր են, կատարելագործված և ավելի կհեշտացնեն գնացքով երթևեկելը։
Հիշեցնենք, որ նոյեմբերի 5-ին խորհրդարանական հանձնաժողովներում բյուջեի քննարկման ժամանակ Գնել Սանոսյանը հայտարարել էր, որ ՀՀ մոտ 200 բնակավայր բացարձակապես զրկված է տրանսպորտից։ Նախարարը նաև ասել էր, որ տրանսպորտային հաղորդակցության խնդիրները վերաբերում են 400 բնակավայրի, համայնքների խոշորացումն էլ պետք է լուծի այդ խնդիրը։